(អង់ការ៉ា)៖ អគ្គលេខាធិការនៃអង្គការណាតូ (NATO) លោក Mark Rutte បាននិយាយថា សិទ្ធិធ្វើបាតុកម្ម និងសេរីភាពសារព័ត៌មាន គឺមានសារៈសំខាន់នៅក្នុងលទ្ធិប្រជាធិបតេយ្យ នៅពេលដែលលោកត្រូវអ្នកកាសែតសួរនាំពាក់ព័ន្ធការបង្ក្រាបរបស់តួកគីយ៉េ ទៅលើក្រុមអ្នកតវ៉ាប្រឆាំង និងចំណាត់ការរឹតត្បិត មុនកិច្ចប្រជុំកំពូលណាតូ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី៧ ខែកក្កដា ឆ្នាំ២០២៦។

តួកគីយ៉េ គឺជាម្ចាស់ផ្ទះទទួលមេដឹកនាំមកពីប្រទេសសមាជិកចំនួន ៣២ ក៏ដូចជាមន្ត្រីមកពីដៃគូរបស់ណាតូ នៅទីក្រុងអង់ការ៉ា សម្រាប់កិច្ចប្រជុំកំពូលនាថ្ងៃអង្គារ និងថ្ងៃពុធនេះ។ អាជ្ញាធរបានបង្កើនការរឹតបន្តឹងសន្តិសុខនៅទូទាំងរដ្ឋធានី ដោយហាមឃាត់ការធ្វើបាតុកម្ម ដំឡើងរបាំង និងបិទផ្លូវ។ កាលពីថ្ងៃអាទិត្យ មនុស្សជាង ១០០នាក់ត្រូវបានចាប់ឃុំឃាំង ក្នុងការដង្ហែក្បួនតវ៉ារៀបចំដោយគណបក្ស និងក្រុមឆ្វេងនិយម ខណៈមនុស្ស ១០៣នាក់ផ្សេងទៀត ត្រូវបានចាប់ខ្លួនក្នុងប្រតិបត្តិការប្រឆាំងភេរវកម្ម នៅទីក្រុងអង់ការ៉ា។

នៅឯសន្និសីទសារព័ត៌មាន លោក Rutte និយាយថាលទ្ធិប្រជាធិបតេយ្យត្រូវតែមាន ឱ្យបានច្រើនជាងការបោះឆ្នោតតែឯង។ ជាការពិតណាស់ លទ្ធិប្រជាធិបតេយ្យគឺសម្រាប់ប្រជាជន រៀបចំបាតុកម្មប្រសិនបើពួកគេជ្រើសរើស ហើយវារឹតតែសំខាន់ទៅទៀត នៅពេលនិយាយដល់ប្រព័ន្ធផ្សព្វផ្សាយ»។ លោក Rutte កត់សម្គាល់ថា វាមានសារៈសំខាន់សម្រាប់ណាតូ ដែលប្រព័ន្ធផ្សព្វផ្សាយ អាចចូលរួមផ្តិតយកព្រឹត្តិការណ៍ដោយផ្ទាល់។

គួរបញ្ជាក់ថា អ្នកកាសែតឯករាជ្យតួកគីយ៉េជាច្រើននាក់ ត្រូវបានបដិសេធមិនឱ្យចូលយកព័ត៌មាន ក្នុងកិច្ចប្រជុំកំពូលនេះ។ សម្រាប់ការចាប់ឃុំឃាង អាជ្ញាធរតួកគីនិយាយថា ប្រតិបត្តិការទាំងនេះ គឺកំណត់លើពួកសកម្មប្រយុទ្ធ ហើយមិនពាក់ព័ន្ធជាមួយកិច្ចប្រជុំកំពូលទេ៕