លោក ណេតាន់យ៉ាហ៊ូ ទទូចឱ្យលោក ត្រាំ កុំលក់យន្តហោះចម្បាំង F-35 ឱ្យទៅតួកគីយ៉េ
07-07-2026 16:58
(វ៉ាស៉ីនតោន)៖ កាលពីថ្ងៃចន្ទ ទី៦ ខែកក្កដា ឆ្នាំ២០២៦ នាយករដ្ឋមន្រ្តីអ៉ីស្រាអែល លោក Benajmin Netanyahu បានទទូចឱ្យសហរដ្ឋអាមេរិក កុំលក់យន្តហោះចម្បាំង F-35 ឬគ្រឿងបរិក្ខារយន្តហោះចម្បាំងឱ្យទៅតួកគីយ៉េ ដោយអះអាងថា វានឹងប៉ះពាល់ដល់តុល្យភាពអំណាចនៅក្នុងតំបន់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។
កាលពីថ្ងៃចន្ទ ប្រធានាធិបតីអាមេរិក លោក ដូណាល់ ត្រាំ បានចេញដំណើរឆ្ពោះទៅទីក្រុងអង់ការ៉ា ដើម្បីចូលរួមកិច្ចប្រជុំកំពូល របស់អង្គការ NATO ហើយដំណើរទស្សនកិច្ចនេះ អាចត្រូវមើលឃើញដោយតួកគីយ៉េ ថាជាឱកាសមួយដើម្បីធានាឱ្យបាន នូវការទិញម៉ាស៉ីនយន្តហោះ និងការចូលរួមជាថ្មីវិញក្នុងកម្មវិធីយន្តហោះចម្បាំង F-35។
យ៉ាងណាមិញ ក្នុងកិច្ចសម្ភាសមួយជាមួយប្រព័ន្ធផ្សព្វផ្សាយអាមេរិក លោកនាយករដ្ឋមន្រ្តីអ៉ីស្រាអែល បានព្រមានថា វានឹងជាកំហុសមួយប្រសិនបើទីក្រុងវ៉ាស៉ីនតោនសម្រេចផ្តល់រង្វាន់ជាបច្ចេកវិទ្យាយោធាទំនើបដល់ប្រធានាធិបតីតួកគីយ៉េ លោក Recep Tayyip Erdogan ដែលលោក Netanyahu អះអាងថា ធ្លាប់អំពាវនាវជាចំហចង់ឱ្យប្រទេសអ៉ីស្រាអែល រលាយសាបសូន្យ។
លោក Netanyahu បានបកស្រាយថា រូបលោកយល់ថា តួកគីយ៉េមិនគួរទទួលបាន F-35 ឬមួយក៏ម៉ាស៉ីនសម្រាប់យន្តហោះចម្បាំងរបស់ពួកគេឡើយ ដ្បិតវានឹងប៉ះពាល់ដល់តុល្យភាពអំណាចនៅមជ្ឈិមបូព៌ា ដែលត្រូវបានធានាដោយឧត្តមភាពលើដែនអាកាសរបស់អ៉ីស្រាអែល និងដោយយុទ្ធសាស្រ្តរបស់អាមេរិកនៅមជ្ឈិមបូព៌ា។
កាលពីខែមិថុនា លោក ត្រាំ បានសន្យាថានឹងធ្វើឱ្យលោក Erdogan សប្បាយចិត្តជាខ្លាំង នៅពេលត្រូវបានសាកសួរ អំពីការដែលតួកគីយ៉េព្យាយាមចង់បានម៉ាស៉ីនយន្តហោះ F110 ពីក្រុមហ៊ុនអាមេរិក GE Aerospace ហើយនិងសិទ្ធិដើម្បីចូលរួមឡើងវិញ ក្នុងកម្មវិធីយន្តហោះចម្បាំង F-35។ កាលពីឆ្នាំ២០១៧ តួកគីយ៉េបានទិញប្រព័ន្ធការពារមីស៉ីល S-400 ពីរុស្ស៉ី ជាហេតុនាំឱ្យទីក្រុងវ៉ាស៉ីនតោនបណ្តេញទីក្រុងអង់ការ៉ាចេញពីកម្មវិធី F-35 នៅឆ្នាំ២០១៩។
ដោយឡែក លោក Netanyahu ក៏បានអះអាងដែរថា រូបលោកនៅតែបន្តជាសម្ព័ន្ធមិត្តដ៏ជិតស្និទ្ធរបស់លោក ត្រាំ បើទោះបីជាមានបញ្ហាបន្តិចបន្តួចក្នុងទំនាក់ទំនងអ្នកទាំងពីរ អំឡុងពេលប៉ុន្មានសប្តាហ៍ចុងក្រោយនេះ ជុំវិញវិបត្តិសង្រ្គាមអ៉ីរ៉ង់ក៏ដោយ។ លោកនាយករដ្ឋមន្រ្តីអ៉ីស្រាអែល បានបញ្ជាក់ថា គម្រោងបើកជំនួបផ្ទាល់ជាមួយលោក ត្រាំ នៅទីក្រុងវ៉ាស៉ីនតោន កំពុងបន្តស្ថិតក្រោមការរៀបចំ ដោយមិនទាន់កំណត់កាលបរិច្ឆេទច្បាស់នៅឡើយទេ។
គួរបញ្ជាក់ថា មេដឹកនាំទាំងពីរបានជួបមុខគ្នាលើកចុងក្រោយ កាលពីខែកុម្ភៈ នៅសេតវិមាន ដែលបើតាមសេចក្តីរាយការណ៍ អំឡុងពេលនោះ លោក Netanyahu បានជំរុញលោក ត្រាំ ឱ្យបំផ្ទុះសង្រ្គាមប្រឆាំងប្រទេសអ៉ីរ៉ង់៕
