(ប៉ារីស)៖ សាលាឧទ្ធរណ៍បារាំង នៅថ្ងៃអង្គារ បានសម្រេចរក្សាការផ្តន្ទាទោសមេដឹកនាំស្តាំនិយមជ្រុល អ្នកស្រី ម៉ារីន ឡឺប៉ែន (Marine Le Pen) ជុំវិញបទចោទប្រកាន់ពីការប្រើប្រាស់មូលនិធិសហភាពអឺរ៉ុប (EU) ខុសគោលដៅ ប៉ុន្តែបានកាត់បន្ថយរយៈពេលហាមឃាត់ការឈរឈ្មោះបោះឆ្នោត ដែលតាមទ្រឹស្តី អាចបើកផ្លូវឱ្យអ្នកស្រីអាចចូលរួមប្រកួតប្រជែងក្នុងការបោះឆ្នោតប្រធានាធិបតីឆ្នាំ២០២៧ បាន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ទោះជាយ៉ាងណា តុលាការក៏បានសម្រេចផ្តន្ទាទោសលោកស្រីឱ្យជាប់ពន្ធនាគាររយៈពេល ៣ឆ្នាំផងដែរ ដោយក្នុងនោះ ២ឆ្នាំជាទោសព្យួរ និង ១ឆ្នាំទៀតត្រូវអនុវត្តដោយការពាក់ឧបករណ៍តាមដានអេឡិចត្រូនិចនៅកជើង។ ការសម្រេចនេះ នឹងធ្វើឱ្យយុទ្ធនាការឃោសនាបោះឆ្នោតរបស់លោកស្រីជួបការលំបាកយ៉ាងខ្លាំងទាំងផ្នែកនយោបាយ និងភស្តុភារ ព្រមទាំងធ្វើឱ្យមានមន្ទិលសង្ស័យថាតើលោកស្រីនឹងបន្តមហិច្ឆតាឈរឈ្មោះជាប្រធានាធិបតីទៀតឬយ៉ាងណា។ កន្លងមក លោកស្រី ឡឺប៉ែន ធ្លាប់បានបញ្ជាក់ថាលោកស្រីមិនចង់ធ្វើការឃោសនាបោះឆ្នោតទាំងជាប់ឧបករណ៍នៅកជើងនោះទេ ព្រោះវាប៉ះពាល់ដល់កិត្តិយសជាបេក្ខជន។

គួរបញ្ជាក់ថា កាលពីខែមីនា ឆ្នាំ២០២៥ លោកស្រីត្រូវបានតុលាការផ្តន្ទាទោសពីបទកិបកេងប្រាក់ និងហាមឃាត់មិនឱ្យកាន់តំណែងសាធារណៈរយៈពេល ៥ឆ្នាំ ដែលកាលនោះបានបិទផ្លូវមហិច្ឆតារបស់លោកស្រីទាំងស្រុង។ ប៉ុន្តែសាលដីកាឧទ្ធរណ៍ថ្មីនេះ បានកាត់បន្ថយបម្រាមមកត្រឹម ៤៥ខែ (ព្យួរ ៣០ខែ) ដែលមានន័យថា លោកស្រីនឹងមានសិទ្ធិឈរឈ្មោះនៅខែមេសា ឆ្នាំ២០២៧ ព្រោះលោកស្រីបានអនុវត្តបម្រាមនេះភាគច្រើនរួចទៅហើយ។ យ៉ាងណាមិញ ការត្រូវពាក់ឧបករណ៍តាមដាននៅកជើង អាចនឹងក្លាយជាឧបសគ្គដ៏ធំបំផុតដែលមិនខុសពីការហាមឃាត់មិនឱ្យឈរឈ្មោះនោះឡើយ៕