(សេអ៊ូល)៖ ប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) នៅថ្ងៃអង្គារ បានសម្តែងក្តីសង្ឃឹមថា ប្រទេសរបស់លោកនឹងអាចពង្រីកកិច្ចសហប្រតិបត្តិការជាមួយសម្ព័ន្ធមិត្តណាតូ (NATO) នៅក្នុងការស្រាវជ្រាវ និងអភិវឌ្ឍន៍ រួមទាំងបច្ចេកវិទ្យាទំនើបៗ និងការផលិតប្រព័ន្ធសព្វាវុធ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ថ្លែងនៅក្នុងវេទិកាឧស្សាហកម្មការពារជាតិ នៃកិច្ចប្រជុំកំពូលណាតូ ក្នុងរដ្ឋធានីអង់ការ៉ា ប្រទេសតួកគី លោក លី បានស្នើឱ្យមានការធ្វើឱ្យប្រសើរឡើងនូវកិច្ចសហប្រតិបត្តិការការពារជាតិបច្ចុប្បន្ន ទៅជា «ភាពជាដៃគូឧស្សាហកម្មការពារជាតិ កូរ៉េខាងត្បូង-ណាតូ កម្រិត ២.០» ដោយលោកបញ្ជាក់ថា វានឹងមិនត្រឹមតែផ្តោតលើការផ្លាស់ប្តូរអាវុធប៉ុណ្ណោះទេ ប៉ុន្តែថែមទាំងរួមបញ្ចូលនូវការស្រាវជ្រាវ ការផលិត និងការធ្វើប្រតិបត្តិការប្រព័ន្ធសព្វាវុធរួមគ្នាផងដែរ។

លោក លី បានសង្កត់ធ្ងន់ថា កូរ៉េខាងត្បូងគឺជាដៃគូដ៏គួរឱ្យទុកចិត្តសម្រាប់សមាជិកណាតូ ដោយលោកបានបញ្ជាក់យ៉ាងដូច្នេះថា «ប្រសិនបើសមត្ថភាពផលិតកម្មប្រកបដោយស្ថិរភាព និងបច្ចេកវិទ្យាដែលត្រូវបានបញ្ជាក់ច្បាស់លាស់របស់កូរ៉េខាងត្បូង អាចចាប់ដៃគូជាមួយចំណេះដឹង និងបទពិសោធន៍ដ៏យូរអង្វែងរបស់ណាតូ នោះសមត្ថភាពការពារជាតិរបស់ភាគីទាំងពីរ នឹងត្រូវបានលើកកម្ពស់យ៉ាងគួរឱ្យកត់សម្គាល់»៕