(អូមស្ក៍)៖ ប្រភពពីឧស្សាហកម្មប្រេងបានឱ្យដឹងនៅថ្ងៃអង្គារថា រោងចក្រចម្រាញ់ប្រេង អូមស្ក៍ (Omsk) ដែលជារោងចក្រធំបំផុតរបស់ប្រទេសរុស្ស៊ី បានផ្អាកប្រតិបត្តិការទាំងស្រុង បន្ទាប់ពីរងការវាយប្រហារដោយយន្តហោះដ្រូនរបស់អ៊ុយក្រែន។ ការផ្អាកដំណើរការរោងចក្រដែលជាអ្នកផ្គត់ផ្គង់ប្រេងសាំងធំបំផុតនេះ ត្រូវបានគេរំពឹងថានឹងធ្វើឱ្យវិបត្តិខ្វះខាតប្រេងនៅរុស្ស៊ី កាន់តែមានសភាពធ្ងន់ធ្ងរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ការវាយប្រហារកាលពីថ្ងៃចន្ទ ទៅលើរោងចក្រដែលស្ថិតនៅជ្រៅក្នុងតំបន់ស៊ីបេរី (Siberia) នេះ គឺជាការវាយប្រហាររយៈចម្ងាយឆ្ងាយបំផុតមួយរបស់អ៊ុយក្រែន។ តំណាងប្រធានាធិបតីរុស្ស៊ីប្រចាំតំបន់ស៊ីបេរី បានបញ្ជាក់ថា ហេដ្ឋារចនាសម្ព័ន្ធរោងចក្រពិតជារងការខូចខាតមែន ប៉ុន្តែគ្មានបុគ្គលិករងរបួសទេ ខណៈក្រុមការងារកំពុងវាយតម្លៃការខូចខាតដើម្បីចាប់ផ្តើមជួសជុល។

យោងតាមប្រភពពីឧស្សាហកម្មប្រេង ម៉ាស៊ីនចម្រាញ់ប្រេងឆៅទី១ (CDU-10) ដែលរ៉ាប់រង ៣៨ភាគរយនៃបរិមាណផលិតកម្មសរុប ត្រូវបានឆាបឆេះ និងរងការខូចខាតយ៉ាងដំណំ។ ចំណែកឯម៉ាស៊ីនចម្រាញ់ទី២ (CDU-11) ដែលរ៉ាប់រង ៣៧ភាគរយ ក៏ត្រូវបានផ្អាកផងដែរ ដោយសារការដាច់បណ្តាញបញ្ជូនសំខាន់ៗ ទោះបីជាមិនរងការវាយប្រហារចំក៏ដោយ ប៉ុន្តែអាចនឹងបើកដំណើរការវិញក្នុងពេលឆាប់ៗ។

គួរបញ្ជាក់ថា ក្រោយការវាយប្រហារ រោងចក្រ Omsk បានបញ្ឈប់ការលក់ប្រេងសាំង និងម៉ាស៊ូតនៅលើទីផ្សារដោះដូរទំនិញអន្តរជាតិសាំងពិតធឺស្បឺកភ្លាមៗ។ កាលពីឆ្នាំមុន រោងចក្រដ៏ធំមួយនេះ បានចម្រាញ់ប្រេងឆៅរហូតដល់ ២២លានតោន ដែលផ្តល់ទិន្នផលប្រេងសាំង ៥លានតោន និងម៉ាស៊ូត ៨លានតោន សម្រាប់ផ្គត់ផ្គង់រុស្ស៊ី៕