(អង់ការ៉ា)៖ នាយករដ្ឋមន្ត្រីកាណាដា លោក Mark Carney បាននិយាយកាលពីថ្ងៃអង្គារ ទី៧ ខែកក្កដា ឆ្នាំ២០២៦ ថាប្រទេសចំនួន ៩ បានប្តេជ្ញាចិត្តចំពោះការបង្កើតធនាគារមួយ សម្រាប់វិស័យការពារជាតិសកល ដែលមានគោលបំណងជំរុញកិច្ចខិតខំប្រឹងប្រែងជាអន្តរជាតិ លើការបំពាក់អាវុធដល់ប្រទេសសម្ព័ន្ធមិត្ត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

ក្នុង​សេចក្តីថ្លែងការណ៍​នៅឯ​កិច្ចប្រជុំ​កំពូល​ណាតូ​ (NATO) នៅ​រដ្ឋធានី​អង់ការ៉ា​ ​ប្រទេស​តួកគីយ៉េ លោក Carney បញ្ជាក់​​ថា អាល់បានី បែលហ្ស៉ិក ក្រិក ឡាតូនី លុចសំបួរ រូម៉ានី តួកគីយ៉េ និង​អ៊ុយក្រែន សុទ្ធតែ​បាន​សន្យា​គាំទ្រ​ដល់​ធនាគារ​ការពារជាតិ សន្តិសុខ និង​ភាពធន់ (Defence, Security and Resilience Bank ហៅកាត់ DSRB) ដែល​នឹង​មាន​មូលដ្ឋាន​ក្នុងប្រទេស​កាណាដា។

បញ្ជីឈ្មោះនេះ មិនមានប្រទេស G7 ធំណាមួយ ក្រៅពីកាណាដាទេ ដែលអាចកំណត់អំណាចហិរញ្ញវត្ថុរបស់ធនាគារ ទោះជារដ្ឋមន្ត្រីការបរទេសកាណាដា លោកស្រី Anita Anand ប្រាប់ Reuters ថាទីក្រុងអូតាវ៉ា នៅតែបើកចំហសម្រាប់សមាជិកថ្មី។ គោលបំណងនៃការបង្កើត DSRB គឺដើម្បីជំរុញការការពារប្រទេសសម្ព័ន្ធមិត្តដែលមានចិត្តគំនិតដូចគ្នា តាមរយៈការរៃអង្គាសប្រាក់ឱ្យបានដល់ ១០០ពាន់លានផោន ឬ ១៣៤ពាន់លានដុល្លារ ក្នុងលក្ខខណ្ឌជាកម្ចីការប្រាក់ទាប។

តាមលោក Carney, DSRB នឹងបញ្ចេញកម្ចីវិនិយោគ ពង្រឹងមូលដ្ឋានឧស្សាហកម្មការពារជាតិ ហើយធានាថាកាណាដា និងសម្ព័ន្ធមិត្តដទៃមានសមត្ថភាពដោះស្រាយបញ្ហាប្រឈម ក្នុងពេលដែលពិភពលោកមានគ្រោះថ្នាក់ និងកាន់តែបែកបាក់សាមគ្គី។ កាណាដា បានឱ្យដឹងថាប្រទេសដៃគូត្រូវបានអញ្ជើញឱ្យផ្តល់សច្ចាប័នលើផែនការទាំងនេះ ដើម្បីធ្វើឱ្យ DSRB អាចដំណើរការនាឆ្នាំ២០២៧៕