(អង់ការ៉ា)៖ ថ្លែងនៅទីក្រុងអង់ការ៉ានាថ្ងៃពុធ ទី៨ ខែកក្កដា ឆ្នាំ២០២៦ នាយករដ្ឋមន្រ្តីដាណឺម៉ាក​ លោកស្រី Mette Frederiksen បាននិយាយថា ប្រទេសលោកស្រីត្រៀមខ្លួនជាស្រេច ដើម្បីការពារទឹកដីសូម្បីតែមួយសង់ទីម៉ែត្ររបស់ ​NATO ក្នុងនោះរួមទាំងទឹកដីរបស់ដាណឺម៉ាកផ្ទាល់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោកស្រី Frederiksen បានសង្កត់ធ្ងន់យ៉ាងដូច្នេះថា «យើងត្រៀមលក្ខណៈជាស្រេច ដើម្បីការពារទឹកដីសូម្បីមួយសង់ទីម៉ែត្រ​របស់ NATO រួមទាំងទឹកដីរបស់ពួកយើងផ្ទាល់... ប្រាកដណាស់យើងនឹងការពារព្រះរាជាណាចក្រដាណឺម៉ាក»។ លោកស្រីបានបន្តថា «ហេតុផលមួយដែលយើងបានបង្កើតអង្គការ NATO ឡើង តាំងតែពីច្រើនឆ្នាំមុន គឺប្រសិនបើមានរឿងអ្វីកើតឡើងចំពោះគ្នាយើង​ណាម្នាក់ នោះសមាជិកទាំងអស់នឹងជួយការពារគ្នាទៅវិញទៅមក»។

គួរបញ្ជាក់ថា កាលពីថ្ងៃអង្គារសប្តាហ៍នេះ ក្នុងឱកាសមកចូលរួមកិច្ចប្រជុំកំពូល NATO នៅរដ្ឋធានីរបស់ប្រទេសតួកគីយ៉េ ប្រធានាធិបតីអាមេរិក លោក ដូណាល់ ត្រាំ បានលើកឡើងជាថ្មីថា សហរដ្ឋអាមេរិកចាំបាច់ត្រូវតែទិញយក ឬគ្រប់គ្រងកោះ Greenland ដែលជាដែនដីពាក់កណ្តាលស្វយ័តស្ថិតក្រោមអធិបតេយ្យរបស់ដាណឺម៉ាក។ បញ្ហានេះបានបង្កឱ្យមានភាពល្អក់កករ​ក្នុងទំនាក់ទំនងរវាងទីក្រុងវ៉ាស៉ីនតោននិងទីក្រុងកូប៉ិនហាក ដែលសុទ្ធតែជាសមាជិកស្ថាបនិកដូចគ្នានៅក្នុង NATO៕