(ហាណូយ)៖ រដ្ឋាភិបាលវៀតណាម កំពុងពិចារណា សង់រោងចក្ររោងចក្រដើរដោយធ្យូងថ្មបន្ថែមទៀត ដើម្បីធានាថាខ្លួនអាចបំពេញតម្រូវការថាមពលបាន ខណៈដែលសង្គ្រាមអ៉ីរ៉ង់បានធ្វើឱ្យស្មុគស្មាញ ដល់ដំណើរការអភិវឌ្ឍរោងចក្រឧស្ម័នធម្មជាតិរាវ (LNG) ដែលមានភាពយឺតយ៉ាវស្រាប់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃ៨ ខែកក្កដា ឆ្នាំ២០២៦។

រដ្ឋាភិបាលវៀតណាម បញ្ជាក់ថា សង្រ្កាមនៅមជ្ឈិមបូព៌ា បានប៉ះពាល់ដល់សន្តិសុខនៃការផ្គត់ផ្គង់ឧស្ម័ន LNG ដែលបង្កើតឱ្យមានតម្រូវការពង្រឹងសន្តិសុខថាមពល ដោយបន្ថែមថា ខ្លួន​អាច​កែសម្រួល​ផែនការ​ថាមពល​ជាតិ ដើម្បី​យក​ថាមពល​​បង្កើត​ពី​ធ្យូងថ្ម​មកបន្ថែម។

វៀតណាម បានកំណត់គោលដៅ ឱ្យមានបណ្តុំរោងចក្រថាមពលដើរដោយឧស្ម័ន LNG ដែលមានសមត្ថភាពសរុប ២២,៥ជីហ្គាវ៉ាត់ នៅឆ្នាំ ២០៣០។ តែមកដល់ពេលនេះសម្រេចបានត្រឹមតែ ៧,៣ភាគរយនៃគោលដៅប៉ុណ្ណោះ ហើយភាគច្រើនដោយសារតែឧបសគ្គផ្នែកបទប្បញ្ញត្តិ និងកង្វះចំណាប់អារម្មណ៍ពីសំណាក់វិនិយោគិន ស្របពេលសង្គ្រាមអ៉ីរ៉ង់ក៏បានបង្កើនក្តីបារម្ភ អំពីសន្តិសុខនៃការផ្គត់ផ្គង់ឧស្ម័ន LNG ផងដែរ៕