(តេហេរ៉ង់)៖ កងកម្លាំងឆ្មាំបដិវត្តន៍អ៉ីរ៉ង់ IRGC បាននិយាយថា ពួកគេបានកំណត់គោលដៅវាយប្រហារលើទីតាំងយោធារបស់​សហរដ្ឋអាមេរិក នៅក្នុងប្រទេសបារ៉ែននិងកូវ៉ែត នាថ្ងៃពុធ ទី៨ ខែកក្កដា ឆ្នាំ២០២៦ បន្ទាប់ពីអាមេរិកបានបើកការវាយប្រហារ​លើប្រទេសអ៉ីរ៉ង់ ឆ្លើយតបការការវាយប្រហារលើកប៉ាល់ដឹកប្រេង នៅច្រកសមុទ្រ Hormuz។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

IRGC បានប្រកាសថា ខ្លួនបានបើកប្រតិបត្តិការវាយប្រហារដោយដ្រូននិងមីស៉ីល ប្រឆាំងទីតាំងយោធាសំខាន់ៗរបស់អាមេរិក ដែលស្ថិតនៅបារ៉ែននិងកូវ៉ែត ហើយថែមទាំងបានបាញ់ទម្លាក់យន្តហោះដ្រូនអាមេរិក MQ-9 មួយគ្រឿង ដែលព្យាយាមជ្រៀតជ្រែក​ប្រតិបត្តិការរបស់ខ្លួន។

សំឡេងស៉ីរ៉ែនប្រកាសត្រូវបានបន្លឺឡើង នៅក្នុងប្រទេសបារ៉ែននិងកូវ៉ែត ខណៈយោធាកូវ៉ែតបានប្រាប់ថា ប្រព័ន្ធការពារដែនអាកាស បានឆ្លើយតបការវាយប្រហារមីស៉ីលនិងដ្រូនរបស់សត្រូវ។ កាលពីថ្ងៃអង្គារ យោធាអាមេរិក បានប្រកាសពីការវាយប្រហារលើ​គោលដៅយ៉ាងហោច៨០របស់អ៉ីរ៉ង់ ហើយទីក្រុងវ៉ាស៉ីនតោន ថែមទាំងសម្រេចដាក់ទណ្ឌកម្មលើប្រេងអ៉ីរ៉ង់ឡើងវិញ បន្ទាប់ពីកប៉ាល់ដឹកប្រេងនិងឧស្ម័នចំនួន៣គ្រឿង បានរងការវាយប្រហារនៅច្រកសមុទ្រ Hormuz ក្នុងសប្តាហ៍នេះ។

គួរបញ្ជាក់ថា ទីក្រុងតេហេរ៉ង់និងទីក្រុងវ៉ាស៉ីនតោន បានចោទគ្នាទៅវិញទៅមកអំពីការបំពានបទឈប់បាញ់។ ការឡើងកម្តៅសាឡើងវិញនេះ គឺជាគំរាមកំហែងថ្មីចុងក្រោយមួយទៀត ចំពោះកិច្ចព្រមព្រៀងបឋមដ៏ផុយស្រួយ ដែលភាគីទាំងពីរបានឈានដល់កាលពីខែមុន ដើម្បីបម្រើជាគ្រឹះឆ្ពោះទៅរកកិច្ចព្រមព្រៀងគ្រប់ជ្រុងជ្រោយចុងក្រោយ ហើយបិទបញ្ចប់ជាផ្លូវការ នូវសង្រ្គាមដែលបានផ្ទុះឡើងតាំងពីខែកុម្ភៈ។ ប្រធានាធិបតីអាមេរិក លោក ដូណាល់ ត្រាំ នៅតែបន្តគំរាមម្តងហើយម្តងទៀតថា ការទម្លាក់គ្រាប់បែកលើប្រទេសអ៉ីរ៉ង់នឹងបន្តឡើងវិញ លុះត្រាតែអ៉ីរ៉ង់ព្រម​ទទួលយកកិច្ចព្រមព្រៀងសន្តិភាព៕