(អង់ការ៉ា)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃពុធ បានគំរាមបើកការវាយប្រហារលើប្រទេសអ៊ីរ៉ង់សាជាថ្មី បន្ទាប់ពីលោកបានប្រកាសថាកិច្ចព្រមព្រៀងបទឈប់បាញ់បឋមជាមួយសាធារណរដ្ឋឥស្លាមមួយនេះ ត្រូវបាន «បញ្ចប់ហើយ» ទោះបីជាលោកមិនទាន់បញ្ជាក់ច្បាស់ថា ទីក្រុងវ៉ាស៊ីនតោននឹងវិលត្រឡប់ទៅរកសង្គ្រាមពេញទំហឹងវិញ ឬយ៉ាងណាក៏ដោយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ថ្លែងនៅក្រៅកិច្ចប្រជុំកំពូលណាតូ (NATO) ក្នុងរដ្ឋធានីអង់ការ៉ា (Ankara) ប្រទេសតួកគី លោក ត្រាំ បានរិះគន់យ៉ាងចាស់ដៃទៅលើមន្ត្រីអ៊ីរ៉ង់ ថាមិនបានគោរពតាមអ្វីដែលបានចរចាព្រមព្រៀងគ្នា។ មុនពេលចូលជួបពិភាក្សាជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី (Volodymyr Zelenskiy) លោក ត្រាំ បានប្រាប់ក្រុមអ្នកសារព័ត៌មានថា «ខ្ញុំសូមព្រមានបន្តិច៖ យើងនឹងវាយប្រហារពួកគេយ៉ាងចាស់ដៃនៅយប់នេះ»។

ការប្រកាសរបស់លោក ត្រាំ អំពីការដួលរលំនៃអនុស្សរណៈយោគយល់គ្នា ដែលជាបទឈប់បាញ់បឋមនោះ បានធ្វើឱ្យតម្លៃប្រេងសកលហក់ឡើងយ៉ាងខ្លាំង។ ទោះជាយ៉ាងណា លោកមិនបានបញ្ជាក់ឱ្យច្បាស់ទេថា តើអាមេរិកនឹងធ្វើសង្គ្រាមទ្រង់ទ្រាយធំ ឬនឹងមានការចរចាបន្តដើម្បីសង្គ្រោះកិច្ចព្រមព្រៀងនេះឡើយ។ លោកបានសង្កត់ធ្ងន់លើគោលដៅសង្គ្រាមរបស់លោកថា ទីក្រុងតេហេរ៉ង់ មិនត្រូវមានអាវុធនុយក្លេអ៊ែរជាដាច់ខាត ប៉ុន្តែលោកបង្ហើបថាគោលដៅនេះអាចនឹងត្រូវសម្រេចដោយមិនបាច់មានកិច្ចព្រមព្រៀង។ លោក ត្រាំ បានបន្ថែមថា៖ «យើងប្រហែលជាធ្វើវាដោយមិនបាច់មានកិច្ចព្រមព្រៀងក៏បាន ព្រោះវាអាចនឹងងាយស្រួលជាង ដោយសារតែមនុស្សទាំងនេះចូលចិត្តកុហក និងបោកប្រាស់»។

ការកើនឡើងកម្តៅនៃជម្លោះនេះបានផ្ទុះឡើងជាថ្មី បន្ទាប់ពីអ៊ីរ៉ង់អះអាងថាខ្លួនបានវាយប្រហារលើមូលដ្ឋានយោធាអាមេរិកនៅប្រទេសបារ៉ែន និងគូវ៉ែត ដើម្បីសងសឹកនឹងការវាយប្រហាររបស់អាមេរិកលើគោលដៅអ៊ីរ៉ង់ ដែលអាមេរិកធ្វើឡើងដើម្បីឆ្លើយតបនឹងការវាយប្រហារលើនាវាដឹកប្រេងនៅច្រកសមុទ្រហ័រមូស។ ការបន្តសង្គ្រាមនេះ បានធ្វើឱ្យមានក្តីបារម្ភយ៉ាងខ្លាំងចំពោះសុវត្ថិភាពនៅច្រកសមុទ្រហ័រមូស ដោយទិន្នន័យនាវាចរណ៍បង្ហាញថា យ៉ាងហោចណាស់មាននាវាដឹកប្រេងនិងហ្គាសចំនួន ៤គ្រឿង បានបង្វែរទិសដៅត្រឡប់ក្រោយវិញ ជាជាងប្រថុយគ្រោះថ្នាក់ឆ្លងកាត់ផ្លូវទឹកដ៏សំខាន់នេះ៕