(អង់ការ៉ា)៖ ប្រធានាធិបតីអាមេរិក លោក ដូណាល់ ត្រាំ បានរិះគន់យ៉ាងខ្លាំងទៅលើបណ្តាប្រទេសជាសម្ព័ន្ធមិត្តណាតូ (NATO) នៅក្នុងកិច្ចប្រជុំកំពូលនៅតួកគី នៅថ្ងៃពុធ ដោយលោកបានសម្តែងការខកចិត្តចំពោះសម្ព័ន្ធភាពនេះ

ដែលបានរារាំងមហិច្ឆតារបស់លោកក្នុងការគ្រប់គ្រងកោះហ្គ្រីនឡែន​ និងមិនបានគាំទ្រសង្គ្រាមរបស់លោកនៅអ៊ីរ៉ង់។ នេះបើតាមការចេញផ្សាយដោយទីភ្នាក់ងារសារព័ត៌មាន​​ Reuters។

ក្នុងកិច្ចប្រជុំមេដឹកនាំទាំង ៣២ប្រទេស លោក ត្រាំ បានរំលឹកសារជាថ្មីថា សហរដ្ឋអាមេរិកគួរតែជាអ្នកគ្រប់គ្រងកោះហ្គ្រីនឡែន ដែលជាដែនដីស្វ័យភាពរបស់ដាណឺម៉ាក ដើម្បីផលប្រយោជន៍ និងការការពារសន្តិសុខពិភពលោកទាំងមូល។ លើសពីនេះ លោកក៏បានស្តីបន្ទោសប្រទេសអឺរ៉ុបមួយចំនួនដែលបដិសេធមិនជួយច្បាំងនៅអ៊ីរ៉ង់ ដោយបានចង្អុលមុខចំៗទៅកាន់អេស្ប៉ាញថាជា «ដៃគូដ៏អាក្រក់បំផុត» និងបានគំរាមកាត់ផ្តាច់ទំនាក់ទំនងពាណិជ្ជកម្មថែមទៀតផង។

ជាការឆ្លើយតប នាយករដ្ឋមន្ត្រីដាណឺម៉ាក បានប្រកាសយ៉ាងដាច់អហង្ការថា៖ «កោះហ្គ្រីនឡែន មិនមែនសម្រាប់លក់នោះទេ»។ លោកស្រីបានសង្កត់ធ្ងន់ថា ដាណឺម៉ាកបានត្រៀមខ្លួនរួចជាស្រេចដើម្បីការពារទឹកដីខ្លួន និងរំពឹងថាសម្ព័ន្ធមិត្តណាតូទាំងអស់នឹងគោរពសិទ្ធិរបស់ប្រជាជនហ្គ្រីនឡែន។ ការចង់បានទឹកដីពីសមាជិកណាតូដូចគ្នាបែបនេះ ត្រូវបានគេមើលឃើញថាអាចគំរាមកំហែងដល់អនាគត និងសាមគ្គីភាពរបស់សម្ព័ន្ធភាពយោធាមួយនេះទាំងមូល។

ដើម្បីព្យាយាមបន្ធូរបន្ថយកំហឹងរបស់លោក ត្រាំ អគ្គលេខាធិការអង្គការណាតូ លោក ម៉ាក រូតត៍ (Mark Rutte) បានលើកសរសើរមេដឹកនាំអាមេរិករូបនេះថា ការដែលបណ្តាប្រទេសអឺរ៉ុបព្រមបង្កើនការចំណាយលើវិស័យការពារជាតិដូចពេលបច្ចុប្បន្ន គឺដោយសារតែឥទ្ធិពល និងការជំរុញយ៉ាងខ្លាំងក្លារបស់លោក ត្រាំ នេះឯង៕