(អង់ការ៉ា)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃពុធ បានបង្ហើបថា លោកអាចនឹងសម្រេចចិត្តដកប្រទេសស៊ីរី ចេញពីបញ្ជីខ្មៅនៃប្រទេសដែលគាំទ្រអំពើភេរវកម្មរបស់សហរដ្ឋអាមេរិក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ការបញ្ជាក់នេះធ្វើឡើងក្នុងអំឡុងពេលជំនួបជាមួយប្រធានាធិបតីស៊ីរីថ្មី លោក អាម៉េដ អាល់សារ៉ា (Ahmed al-Sharaa) នៅប្រទេសតួកគី។ ការជាប់ឈ្មោះក្នុងបញ្ជីខ្មៅនេះ បានធ្វើឱ្យស៊ីរីត្រូវរងការរឹតបន្តឹងលើជំនួយបរទេស ការទិញអាវុធ និងប្រតិបត្តិការហិរញ្ញវត្ថុអន្តរជាតិ។ កាលពីខែមុន លោក ត្រាំ ទើបតែបានចុះហត្ថលេខាបញ្ចប់ទណ្ឌកម្មសេដ្ឋកិច្ចភាគច្រើនលើស៊ីរី ដើម្បីបើកផ្លូវឱ្យប្រទេសនេះអាចធ្វើសមាហរណកម្មសេដ្ឋកិច្ចអន្តរជាតិវិញ និងដើម្បីជួយស្តារប្រទេសក្រោយសង្គ្រាមស៊ីវិល។

ទោះបីជាបានដកទណ្ឌកម្មសេដ្ឋកិច្ចជាទូទៅក្តី ប៉ុន្តែទីក្រុងវ៉ាស៊ីនតោនអះអាងថា ទណ្ឌកម្មនឹងនៅតែបន្តផ្តោតលើអតីតប្រធានាធិបតី អាសាដ (Assad) និងបក្ខពួកដដែល។ នៅក្នុងជំនួបនោះ លោក ត្រាំ បានកោតសរសើរលោក អាល់សារ៉ា ដែលបានដឹកនាំកម្លាំងផ្តួលរំលំរបបលោក អាសាដ កាលពីចុងឆ្នាំ២០២៤។ ទោះបីជាលោក អាល់សារ៉ា ធ្លាប់ជាមេបញ្ជាការក្រុម Al Nusra ដែលពាក់ព័ន្ធនឹងក្រុមភេរវករ Al Qaeda ក្តី ប៉ុន្តែលោកបានកាត់ផ្តាច់ចំណងតាំងពីឆ្នាំ២០១៦ មកម្ល៉េះ។ លោក ត្រាំ បានសង្កត់ធ្ងន់ថា មេដឹកនាំស៊ីរីថ្មីរូបនេះ ទទួលបានការគោរពពីមនុស្សគ្រប់គ្នា រួមទាំងរូបលោកផ្ទាល់ផងដែរ៕