(អង់ការ៉ា)៖ ប្រធានាធិបតីអាមេរិក លោក ដូណាល់ ត្រាំ បានប្រកាសថាសហរដ្ឋអាមេរិកនឹងផ្ដល់ឱ្យអ៊ុយក្រែននូវអាជ្ញាបណ្ណដើម្បីផលិតគ្រាប់មីស៊ីលសម្រាប់ប្រព័ន្ធខែលប្រឆាំងមីស៊ីល Patriot ដែលនេះជាការលើកទឹកចិត្តដ៏ធំមួយសម្រាប់ទីក្រុងកៀវដែលព្យាយាមស្វែងរកការអនុញ្ញាតផលិតប្រព័ន្ធអាវុធការពារខ្លួនជាយូរមកហើយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ការប្រកាសបែបនេះរបស់លោក ដូណាល់ ត្រាំ ធ្វើឡើងក្នុងជំនួបជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នៅឯកិច្ចប្រជុំកំពូល NATO ក្នុងទីក្រុងអង់ការ៉ា ប្រទេសតួកគីយ៉េ កាលពីថ្ងៃពុធ ទី៨ ខែកក្កដា ឆ្នាំ២០២៦។ «យើងនឹងផ្ដល់ឱ្យអ្នកនូវអាជ្ញាបណ្ណដើម្បីផលិតគ្រាប់មីស៊ីលសម្រាប់ប្រព័ន្ធ Patriots...ដូច្នេះអ្នកមិនអាចត្អូញត្អែរថាយើងមិនបានផ្ដល់ឱ្យគ្រប់គ្រាន់ទៀតនោះទេ»។ នេះជាការគូសបញ្ជាក់របសលោក ត្រាំ ដោយបន្ថែមថាលោកពេញចិត្តផ្ដល់ឱ្យអ៊ុយក្រែននូវប្រព័ន្ធអាវុធការពារខ្លួន ជាជាងប្រព័ន្ធអាវុធវាយលុក។

លោក ត្រាំមិនបានបញ្ជាក់លម្អិតអ្វីទេ ប៉ុន្តែនេះជាការផ្លាស់ប្ដូរដ៏គួរឱ្យភ្ញាក់ផ្អើលមួយក្នុងគោលជំហររបស់លោកចំពោះអ៊ុយក្រែន ដែលកន្លងមកលោកបានរិះគន់លោក ហ្សេលេនស្គី ដែលលោកធ្លាប់ចាត់ទុកថាជាមនុស្សមិនចេះដឹងគុណ។ បើតាមលោក ត្រាំ រូបលោកនឹងបើកកិច្ចសន្ទនាតាមទូរស័ព្ទជាមួយលោកប្រធានាធិបតីរុស្ស៉ី វ្ល៉ាឌីមៀ ពូទីន ក្នុងពេលឆាប់ៗ។ កាលពីថ្ងៃពុធ លោក ត្រាំ ក៏បានអះអាងដែរថា ទីក្រុងមូស្គូ និងទីក្រុងកៀវមានបំណងចង់បញ្ចប់សង្រ្គាម។

គួរបញ្ជាក់ថា ភ្លាមៗមិនទាន់មានការបញ្ជាក់ឱ្យច្បាស់ថាតើនឹងមានការបញ្ជូនគ្រាប់មីស៊ីលទៅឱ្យអ៊ុយក្រែនឬ៏យ៉ាងណានោះទេ? តែប្រភពចំនួន២ដែលបានដឹងពីកិច្ចភាក្សាប្រាប់ Reuters គ្រាប់មីស៊ីលថ្មីទំនងជានឹងត្រូវបានផលិតនៅក្នុងប្រទេសអាល្លឺម៉ង់ ឬប្រទេសអឺរ៉ុបផ្សេងទៀត ដើម្បីកុំឱ្យការផលិតគ្រាប់មីស៊ីលក្លាយជាគោលដៅនៃការវាយប្រហាររបស់រុស្ស៉ីក្នុងប្រទេសអ៊ុយក្រែន៕