(ប៉េកាំង)៖ ព្យុះទីហ្វុង Bavi បានបក់បោកឆ្ពោះទៅកាន់ភាគអាគ្នេយ៍នៃកោះតៃវ៉ាន់ ក្នុងមហាសមុទ្រប៉ាស៊ីហ្វិក នៅថ្ងៃព្រហស្បតិ៍ ទី៩ ខែកក្កដា ឆ្នាំ២០២៦ ដោយល្បឿនខ្យល់បានថយចុះ បន្តិចមកនៅ ២០០គីឡូម៉ែត្រក្នុងមួយម៉ោង ខណៈអាជ្ញាធរបានជំរុញឱ្យប្រជាជនស្ដុកស្បៀងសំខាន់ៗទុក និងត្រៀមលក្ខណៈការពារខ្លួនពីព្យុះមួយនេះដែលអាចនឹងក្លាយជាព្យុះទីហ្វុង ដ៏កំណាចបំផុតមួយចាប់តាំងពីឆ្នាំ២០២៤មក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ព្យុះទីហ្វុង Bavi ត្រូវបានរំពឹងថានឹងបក់បោកទៅដល់ភាគខាងជើងនៃកោះតៃវ៉ាន់ មុនវាបក់បោកទៅដល់ដីគោកនៃខេត្ត Fujian ភាគខាងកើតប្រទេសចិន នៅល្ងាចថ្ងៃសៅរ៍ចុងសប្ដាហ៍នេះ។ មន្ត្រីឧតុនិយមតៃវ៉ាន់ម្នាក់បានប្រាប់ Reuters ថាព្យុះ Bavi ត្រូវបានរំពឹងថាក៏អាចនឹងក្លាយជាព្យុះដ៏ធំបំផុតមួយដែលនឹងវាយប្រហារលើតៃវ៉ាន់ចាប់តាំងពីឆ្នាំ១៩៨៧ ផងដែរ។

ចិន និងជប៉ុន រួមទាំងកោះតៃវ៉ាន់ត្រូវបានគេមើលឃើញថាបានជួបប្រទះនឹងគ្រោះធម្មជាតិ ជាពិសេសគឺព្យុះ និងទឹកជំនន់កាន់តែច្រើនឡើងពីមួយឆ្នាំទៅមួយឆ្នាំ ដោយសារតែការប្រែប្រួល អាកាសធាតុ។ ក្នុងឆ្នាំ២០២៦នេះ ការព្រួយបារម្ភមានរឹតតែខ្លាំងឡើងទៅទៀត ដ្បិតបាតុភូត El Nino អាចនឹងជំរុញអាកាសធាតុកាន់តែក្ដៅ ហើយធ្វើឱ្យព្យុះទីហ្វុងកើតឡើងកាន់តែញឹកញាប់ ថែមទៀត។

គួរបញ្ជាក់ថា បើតាមគេហទំព័រ AccuWeather ប្រសិនបើ ព្យុះ Bavi អាចរក្សាបានឥទ្ធិពលរបស់ខ្លួនដូចការព្យាករមែន នោះវានឹងក្លាយជាព្យុះទីហ្វុងដ៏មានឥទ្ធិពលបំផុតមួយ ក្នុងតំបន់អាស៊ីប៉ាស៊ីហ្វិក ចាប់តាំងពីព្យុះ Super Typhoon Kong-rey ក្នុងឆ្នាំ២០២៤៕