(ញូវយ៉ក)៖ ចៅក្រមអាមេរិកម្នាក់ នៅថ្ងៃពុធ ទី៨ ខែកក្កដា ឆ្នាំ២០២៦ បានបង្គាប់ឱ្យលោកប្រធានាធិបតី ដូណាល់ ត្រាំ សងជំងឺចិត្ត ៥លានដុល្លារទៅឱ្យអតីតអ្នកសែត លោកស្រី E. Jean Carroll បន្ទាប់ពីគណៈវិនិច្ឆ័យមួយលើសំណុំរឿងរដ្ឋប្បវេណីបានរកឃើញថារូបលោកមានពិរុទ្ធភាពលើបទចោទបំពានផ្លូវភេទ និងបរិហារកេរ្តិ៍។ នេះបើតាមការចេញផ្សាយដោយទីភ្នាក់ងារ សារព័ត៌មាន Reuters។

កាលពីសប្ដាហ៍មុន តុលាការកំពូលអាមេរិក បានទាត់ចោលការប្ដឹងទាស់របស់លោក ដូណាល់ ត្រាំ ប្រឆាំងនឹងសាលក្រមសម្រេចមួយកាលពីខែឧសភា ឆ្នាំ២០២៣ ដែលបង្គាប់ឱ្យរូបលោកបង់ ប្រាក់សងជំងឺចិត្ត ២លានដុល្លារសម្រាប់ការបំពានផ្លូវភេទ និង៣លានដុល្លារសម្រាប់ការបរិហារកេរ្តិ៍ ទៅឱ្យលោកស្រី Carroll។ លោកស្រី Carroll ជាអតីតអ្នកកាសែតម្នាក់ដែលឥលូវមានអាយុ ៨២ឆ្នាំ បានចោទប្រកាន់លោក ត្រាំ ថាបានរំលោភផ្លូវភេទលើលោកស្រី ក្នុងបន្ទប់ផ្លាស់សម្លៀកបំពាក់ក្នុងផ្សារទំនើបមួយកន្លែងនៃទីក្រុងញូវយ៉ក កាលពីឆ្នាំ១៩៩៦។ ការចោទប្រកាន់នេះធ្វើឡើង ក្នុងសៀវភៅមួយរបស់លោកស្រីបោះពុម្ភផ្សាយកាលពីឆ្នាំ២០១៩ ហើយនៅពេលនោះដែរ លោក ត្រាំ បានហៅលោកស្រីថាមនុស្សឆ្កួត និងប្រឌិតរឿងចោទប្រកាន់់លើរូបលោក។

តាមរយៈការទាត់ចោលបណ្ដឹងទាស់របស់លោក ត្រាំ តុលាការកំពូលបានសម្រេចចិត្តតម្កល់ទុកសាលក្រមរបស់គណៈវិច្ឆ័យកាលពីខែឧសភា ឆ្នាំ២០២៣ ទុកជាបានការដដែល។ កាលពីថ្ងៃពុធ ចៅក្រមសហព័ន្ធ លោក Lewis Kaplan បានបង្គាប់ឱ្យលោក ត្រាំ សងជំងឺចិត្ត ៥លានដុល្លារឱ្យលោកស្រី Carroll។ ដោយឡែក ក្នុងបណ្ដឹងបរិហារកេរ្តិ៍ដាច់ដោយឡែកមួយផ្សេងទៀត ក្នុងតុលាការក្រុងញូវយ៉ក លោក ត្រាំ ក៏ត្រូវបានបង្គាប់ឱ្យសងជំងឺចិត្ត ៨៣,៣លានដុល្លារទៅឱ្យលោកស្រី Carroll ផងដែរ។ សាលក្រមនេះត្រូវបានសាលាឧទ្ធរណ៍តម្កល់ទុកជាបានការ ប៉ុន្តែការអនុវត្តត្រូវបានព្យួរនៅឡើយ។

គួរបញ្ជាក់ថា សាលក្រមសម្រេចរបស់តុលាការអាមេរិកគឺជាសំណុំរឿងរដ្ឋប្បវេណីប៉ុណ្ណោះ ហើយលោក ត្រាំ មិនត្រូវបានចោទប្រកាន់ពីបទល្មើសព្រហ្មទណ្ឌនោះទេ ក៏ព្រោះតែអង្គហេតុ បានកើតឡើងតាំងពីឆ្នាំ១៩៩៦ម្ល៉េះ ដែលនេះត្រូវផុតអាជ្ញាយុកាលខាងទោសព្រហ្មទណ្ឌ៕