(មូស្គូ)៖ រុស្ស៉ី បានថ្កោលទោសការសម្រេចចិត្តរបស់អង្គការណាតូ (NATO) នៅឯកិច្ចប្រជុំកំពូល ក្នុងប្រទេសតួកគីយ៉េ កាលពីថ្ងៃពុធសប្តាហ៍នេះ ដោយនិយាយថា ពួកគេអាចមានផលវិបាកដ៏មហន្តរាយ បន្ទាប់ពីបក្សសម្ព័ន្ធយោធាមួយនេះ ប្រកាសផ្តល់ជំនួយយោធាសម្រាប់អ៊ុយក្រែន និងបញ្ជាក់ជាថ្មីអំពីការប្តេជ្ញាចិត្តក្នុងកិច្ចការពារជាសមូហភាព។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី៩ ខែកក្កដា ឆ្នាំ២០២៦។

អ្នកនាំពាក្យក្រសួងការបរទេសរុស្ស៉ី លោកស្រី Maria Zakharova បាននិយាយថា អាទិភាពរបស់ NATO នៅតែមិនផ្លាស់ប្តូរ ការធ្វើយោធានីយកម្មនៅតំបន់អឺរ៉ុប ការផ្តោតលើការកសាងសមត្ថភាពការពារជាតិ ការត្រៀមលក្ខណៈសម្រាប់ជម្លោះប្រដាប់អាវុធជាមួយរុស្ស៉ី ហើយពិតណាស់គឺជំនួយសម្រាប់អ៊ុយក្រែនតែម្តង។

នៅលើសេចក្តីថ្លែងការណ៍របស់ក្រសួងការបរទេស លោកស្រី Zakharova គូសបញ្ជាក់ថា «ប្រសិនបើ NATO ផ្អាកយុទ្ធសាស្រ្តសិន ហើយគិតមួយភ្លែត ពួកគេប្រហែលជាមិនសម្រេចចិត្ត ដែលគ្មានការទទួលខុសត្រូវបែបនេះឡើយ ហើយដែលអាចនាំទៅរកគ្រោះមហន្តរាយ មិនត្រឹមតែសម្រាប់សម្ព័ន្ធមិត្តប៉ុណ្ណោះទេ ប៉ុន្តែសម្រាប់ពិភពលោកទាំងមូល»។

គួរបញ្ជាក់ថា នៅឯ​កិច្ចប្រជុំ​កំពូល​ សមាជិក ​NATO ​បាន​សន្យា​ផ្តល់​ជំនួយ​យោធា​ចំនួន ៧០ពាន់​លាន​អឺរ៉ូ ឬ៨០ពាន់លាន​ដុល្លារដល់​អ៊ុយក្រែន​សម្រាប់​ឆ្នាំ២០២៦។ ពួកគេបានបញ្ជាក់ជាថ្មីនូវការប្តេជ្ញាចិត្តដ៏រឹងមាំ ចំពោះកិច្ចការពារជាសមូហភាព ក្រោមមាត្រា ៥ របស់ NATO នៅក្នុងសេចក្តីប្រកាសនៃកិច្ចប្រជុំ ជាមួយការបង្ហាញកិច្ចព្រមព្រៀងអាវុធដែលមានតម្លៃ ៥០ពាន់លានដុល្លារ៕