(វែលីងតោន)៖ នៅថ្ងៃព្រហស្បតិ៍ ទី៩ ខែកក្កដា ឆ្នាំ២០២៦ នាយករដ្ឋមន្រ្តីនូវែលសេឡង់ លោក Christopher Luxon បាននិយាយថា ប្រទេសរបស់លោក នឹងពិចារណាចូលរួមជាមួយ សម្ព័ន្ធភាពការពារជាតិរវាងអូស្រ្តាលីនិងហ្វ៊ីជី ដែលប្រទេសទាំងពីរ ទើបតែបានចុះហត្ថលេខាបង្កើតឡើងក្នុងសប្តាហ៍នេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

អូស្រ្តាលីនិងប្រទេសដែនកោះហ្វ៊ីជី បានចុះសន្ធិសញ្ញាការពារជាតិធំមួយ ហៅថា សម្ព័ន្ធភាពមហាសមុទ្រសន្តិភាព កាលពីថ្ងៃចន្ទដើមសប្តាហ៍នេះ ដែលតម្រូវឱ្យប្រទេសទាំងពីរ ជួយការពារគ្នាទៅវិញទៅមក ក្នុងករណីភាគីណាមួយរងការវាយប្រហារ ខណៈដែលអូស្រ្តាលីបាននិងកំពុងព្យាយាមទប់ទល់ ការរីកធំនៃឥទ្ធិពលរបស់ចិន នៅក្នុងតំបន់ប៉ាស៉ីហ្វិក។

សន្ធិសញ្ញាខាងលើ គឺជាសម្ព័ន្ធភាពដំបូងបំផុតសម្រាប់ហ្វ៊ីជី ហើយធ្វើឱ្យហ្វ៊ីជីក្លាយជាសម្ព័ន្ធមិត្តផ្លូវការទី៤របស់អូស្រ្តាលី បន្ទាប់ពីសហរដ្ឋអាមេរិក នូវែលសេឡង់ និងប៉ាពូអាស៉ីនូវែលហ្គីណេ។ កិច្ចព្រមព្រៀងនេះ បើកចំហឱ្យរដ្ឋដទៃទៀតនៅតំបន់ប៉ាស៉ីហ្វិក អាចចូលរួមបានផងដែរ។

គួរបញ្ជាក់ថា នូវែលសេឡង់ សព្វថ្ងៃមានសម្ព័ន្ធមិត្តផ្លូវការតែមួយគត់ នោះគឺអូស្រ្តាលី ប៉ុន្តែជាសមាជិកនៅក្រុមប្រទេសចែករំលែក​ព័ត៌មានសម្ងាត់ ហៅថា Five Eyes ហើយក៏ជាដៃគូសំខាន់មួយរបស់អង្គការ NATO ផងដែរ។ អ្វីដែលគួរឱ្យកត់សម្គាល់ សេចក្តីប្រកាសខាងលើ គឺធ្វើឡើងបន្ទាប់ពីចិនទើបតែបានធ្វើតេស្តបាញ់មីស៉ីលបាលិស្ទីគ ចេញពីនាវាមុជទឹកដើរដោយ​ថាមពលនុយក្លេអ៊ែរ ចូលក្នុងមហាសមុទ្រប៉ាស៉ីហ្វិក កាលពីថ្ងៃចន្ទ ដែលបានធ្វើឱ្យបណ្តានានានៅក្នុងតំបន់ នាំគ្នាចេញមុខប្រតិកម្មនិងបង្ហាញក្តីបារម្ភ៕