(យូអិន)៖ កាលពីថ្ងៃពុធ ទី៨ ខែកក្កដា ឆ្នាំ២០២៦ អង្គការសហប្រជាជាតិ UN បានប្រកាសស្វែងរកថវិកាជាបន្ទាន់ចំនួនជិត​៣០០លានដុល្លារ ដើម្បីយកទៅគាំទ្រប្រតិបត្តិការជួយសង្រ្គោះ នៅវ៉េណេស៊ុយអេឡា ដែលបានរងគ្រោះរញ្ជួយដីយ៉ាងធ្ងន់ធ្ងរ នាពេលកន្លងមកនេះ ហើយតួលេខមនុស្សស្លាប់បានបន្តកើនដល់ជាង៣៨០០នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ប្រធានទទួលបន្ទុកផ្នែកមនុស្សធម៌របស់ UN លោក Tom Fletcher បាននិយាយថា ថវិកាចំនួនប្រហែល២៩៦លានដុល្លារ គឺត្រូវការចាំបាច់ ដើម្បីយកទៅផ្តល់ជំនួយជាបន្ទាន់ សម្រាប់មនុស្សប្រហែល១,៣លាននាក់ នៅវ៉េណេស៊ុយអេឡា សម្រាប់រយៈពេល​៦ខែ។ រដ្ឋាភិបាលទីក្រុងការ៉ាកាសផ្ទាល់ ក៏បានអំពាវនាវឱ្យមានការដោះលែងទ្រព្យសម្បត្តិរបស់ខ្លួន ដែលត្រូវបានបង្កកនៅបរទេសផងដែរ ដើម្បីរកមូលនិធិសម្រាប់ការជួសជុលស្ថាបនាប្រទេសឡើងវិញ។

ប្រធានាធិបតីស្តីទីវ៉េណេស៊ុយអេឡា លោកស្រី Delcy Rodriguez បាននិយាយថា លោកស្រីបានស្នើឱ្យព្រះមហាក្សត្រចក្រភពអង់គ្លេស ដោះលែងមាសវ៉េណេស៊ុយអេឡាប្រមាណ ៣០តោន ដែលត្រូវបានបង្កកនៅក្រោមទណ្ឌកម្មរបស់ទីក្រុងឡុងដ៍។ ចំណែក រដ្ឋាភិបាលអាមេរិក បានដកទណ្ឌកម្មសេដ្ឋកិច្ចមួយចំនួនសម្រាប់រយៈពេល ៤ខែ ដើម្បីជួយសម្រួលដល់ប្រតិបត្តិការជួយសង្រ្គោះ នៅវ៉េណេស៊ុយអេឡា។

គួរបញ្ជាក់ថា បើតាមការប៉ាន់ស្មានរបស់ UN គ្រោះរញ្ជួយដីភ្លោះកម្រិត៧,២រ៉ិចទ័រ និង៧,៥រ៉ិចទ័រ ដែលបានវាយប្រហារកាលពី​២សប្តាហ៍មុន បានបង្កការខូចខាត គិតជាទឹកប្រាក់សរុបខ្ទង់ ៦,៧ពាន់លានដុល្លារ ឬស្មើនឹង៦ភាគរយនៃ GDP របស់វ៉េណេស៊ុយអេឡា។ កាលពីថ្ងៃពុធ តួលេខមនុស្សស្លាប់ក្នុងគ្រោះមហន្តរាយនេះ បានបន្តកើនដល់៣៨១១នាក់ ហើយជិត​១៧០០០នាក់រងរបួស និងជិត១៨០០០នាក់ បានបាត់បង់ទីជម្រក៕