(ប៉ារីស)៖ នៅថ្ងៃព្រហស្បតិ៍ ទី៩ ខែកក្កដា ឆ្នាំ២០២៦ រដ្ឋមន្រ្តីការបរទេសបារាំង លោក Jean-Noel Barrot បាននិយាយថា អ៉ីរ៉ង់ផ្ទាល់គឺជាអ្នកនាំរឿងដាក់ខ្លួនឯង បង្កឱ្យអាមេរិកបើកការវាយប្រហារជាថ្មី ដោយសារតែបានបំពានកិច្ចព្រមព្រៀងឈប់បាញ់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្នុងកិច្ចសម្ភាសជាមួយប្រព័ន្ធផ្សព្វផ្សាយក្នុងស្រុក នៅពេលត្រូវបានសាកសួរអំពីការវាយប្រហារថ្មីចុងក្រោយរបស់សហរដ្ឋអាមេរិក លោក Barrot បានលើកឡើងថា វាគឺមកពីអ៉ីរ៉ង់ខ្លួនឯង ដែលតាមរយៈការវាយប្រហារលើកប៉ាល់ធ្វើដំណើរនៅដែនទឹករបស់អូម៉ង់ គឺបានបំពានការប្តេជ្ញារបស់ខ្លួនផ្ទាល់ ក៏ដូចជាច្បាប់អន្តរជាតិ។ លោកបន្តថា អ៉ីរ៉ង់បានបំពានកិច្ចព្រមព្រៀង ដែលសម្រេចបានជាមួយ​អាមេរិកកាលពីខែមុន ខណៈទង្វើនេះចាំបាច់តែបញ្ឈប់ ដើម្បីឱ្យកិច្ចចរចាដ៏សំខាន់អាចបន្ត នៅក្រោមលក្ខខណ្ឌប្រសើរបំផុតតាមតែ​អាចធ្វើទៅរួច។ លោករដ្ឋមន្រ្តីការបរទេសបារាំង បានទទូចឱ្យភាគីទាំងពីរវិលទៅរកភាពស្ងប់ស្ងាត់វិញ។

គួរបញ្ជាក់ថា ថ្ងៃព្រហស្បតិ៍នេះ គឺជាថ្ងៃទី២ជាប់គ្នា ដែលអាមេរិកនិងអ៉ីរ៉ង់ បានបន្តវាយប្រហារទៅវិញទៅមក។ ខាងអាមេរិក បានអះអាងថា ការវាយប្រហារថ្មីចុងក្រោយរបស់ខ្លួន មានគោលដៅទៅលើសមត្ថភាពរបស់អ៉ីរ៉ង់ ក្នុងការគំរាមកំហែងសេរីភាព​នៃការធ្វើនាវាចរណ៍នៅច្រកសមុទ្រ Hormuz ខណៈអ៉ីរ៉ង់បានតបតវិញ ដោយវាយប្រហារមូលដ្ឋានទ័ពអាមេរិក នៅប្រទេសកូរ៉ែត បារ៉ែន និងកាតា៕