(Melbourne)៖ អូស្ត្រាលី និងឥណ្ឌា បានឈានដល់កិច្ចព្រមព្រៀងមួយ ដើម្បីនាំចេញសារធាតុអ៊ុយរ៉ាញ៉ូមរបស់អូស្ត្រាលីទៅកាន់ឥណ្ឌា សម្រាប់ប្រើប្រាស់ក្នុងឧស្សាហកម្មថាមពលនុយក្លេអ៊ែរ ខណៈយល់ព្រមពង្រឹងកិច្ចសហប្រតិបត្តិការផ្នែកវិស័យថាមពលកកើតឡើងវិញ រ៉ែសំខាន់ៗ និងអ៉ីដ្រូសែនបៃតង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី៩ ខែកក្កដា ឆ្នាំ២០២៦។

«កិច្ចព្រមព្រៀងនេះ នឹងជួយបង្កើនការរួមចំណែកនៃសមត្ថភាពថាមពលមិនមែនឥន្ធនៈហ្វូស៉ីល ហើយផ្តល់ទីផ្សារបន្ថែមសម្រាប់វិស័យធនធានរបស់អូស្ត្រាលី»។ នេះជាការបញ្ជាក់របស់នាយករដ្ឋមន្ត្រី លោក Anthony Albanese ទៅកាន់អ្នកយកព័ត៌មានក្នុងទីក្រុង Melbourne បន្ទាប់ពីសម្រេចកិច្ចព្រមព្រៀងជាមួយនាយករដ្ឋមន្ត្រីឥណ្ឌា លោក Narendra Modi។

ទោះជាប្រទេសទាំងពីរ មានកតិកាសញ្ញាសហប្រតិបត្តិការនុយក្លេអ៊ែរក្នុងឆ្នាំ២០១៤ ក៏ដោយ តែការនាំចេញអ៊ុយរ៉ាញ៉ូមត្រូវបានដាក់កំហិត ដោយសារតែការព្រួយបារម្ភអំពីការធានាថា ឥន្ធនៈនុយក្លេអ៊ែរត្រូវបានប្រើប្រាស់សម្រាប់តែគោលបំណងស៉ីវិល ដូចជាការផលិតថាមពលជាដើម។ លោក Modi ដែលកំពុងបំពេញទស្សកិច្ចនៅអូស្រ្តាលី គូសបញ្ជាក់ថា បច្ចេកវិទ្យា ដើមទុន និងធនធានរបស់អូស្ត្រាលី អាចជួយពន្លឿនការផ្លាស់ប្តូរប្រព័ន្ធថាមពលរបស់ឥណ្ឌា។ លោក Modi ក៏បានបង្ហាញពីកិច្ចសហប្រតិបត្តិការដែលអាចធ្វើទៅបាន ក្នុងគម្រោងអាលុយមីញ៉ូមកាបូនទាបផងដែរ។

គួរបញ្ជាក់ថា ឥណ្ឌាបានតាមដានជាយូរមកហើយ អំពីធនធានអ៊ុយរ៉ាញ៉ូមរបស់អូស្ត្រាលី ដើម្បីសម្រេចគោលដៅសមត្ថភាពថាមពលនុយក្លេអ៊ែរក្នុងកម្រិត ១០០ជីហ្គាវ៉ាត់ នាឆ្នាំ២០៤៧ ខណៈដែលអូស្ត្រាលី កំពុងស្វែងរកការធ្វើពិពិធកម្មពាណិជ្ជកម្ម លើសពីការពឹងផ្អែកលើចិន ដែលជាដៃគូកំពូលរបស់ខ្លួន៕