(តូក្យូ)៖ ប៉ូលិសជប៉ុន បានចាប់ខ្លួនស្រ្តីម្នាក់នៅក្បែរទីក្រុងតូក្យូ ដោយចោទប្រកាន់ ថាបានយកម្ជុលដេរមាត់អ្នករស់នៅក្នុងផ្ទះជាមួយគ្នា។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃព្រហស្បតិ៍ ទី៩ ខែកក្កដា ឆ្នាំ២០២៦។

មន្ត្រីប៉ូលិសជាន់ខ្ពស់ក្នុងតំបន់ ប្រាប់ AFP ថាជនរងគ្រោះជាស្ត្រីអាយុ ៤២ឆ្នាំ បានរត់មកពីផ្ទះ ក្នុងក្រុង Koga ទៅកាន់ហាងមួយជិតនោះ ហើយលើកក្រដាសមួយសន្លឹក ដែលមានសរសេរថា «សូមជួយខ្ញុំផង»។

ក្រោយមកប៉ូលិស បានចាប់ខ្លួនជនសង្ស័យឈ្មោះ Masae Sakurai អាយុ ៤៩ឆ្នាំ ពីបទសង្ស័យប្រព្រឹត្តិអំពើហិង្សា។ អ្នកនាំពាក្យប៉ូលិសបានឱ្យដឹងថា នៅថ្ងៃកើតហេតុទី ២៩ ខែមិថុនា ជនសង្ស័យ Sakurai បានប្រើម្ជុល និងអំបោះដេរមាត់ជនរងគ្រោះ ដែលជាអ្នករស់នៅជាមួយគ្នា។

បច្ចប្បន្ន ប៉ូលិសកំពុងស៉ើបអង្កេតហេតុការណ៍នេះ រួមទាំងព័ត៌មានដែលមិនទាន់បានបញ្ជាក់ថា មានមនុស្សម្នាក់ទៀតរស់នៅក្នុងផ្ទះជាមួយគ្នា៕