(ហ្ស៊េរុយសាឡិម)៖ រដ្ឋមន្ត្រីការពារជាតិអ៉ីស្រាអែល លោក Israel Katz បាននិយាយថាប្រទេសរបស់លោកបានត្រៀមខ្លួនជាស្រេច ដើម្បីបើកប្រតិបត្តិការយោធាឡើងវិញប្រឆាំងនឹងអ៉ីរ៉ង់ ក្នុងករណីចាំបាច់។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ការអត្ថាធិប្បាយបែបនេះរបស់ប្រមុខការពារជាតិអ៉ីស្រាអែល កើតមានឡើងចំពេលការវាយប្រយុទ្ធគ្នាបានផ្ទុះឡើងជាថ្មីរវាងសហរដ្ឋអាមេរិក និងអ៉ីរ៉ង់ ដោយកំពុងបង្កឱ្យមានការព្រួយបារម្ភពីការផ្ទុះសង្រ្គាមឡើងវិញ បន្ទាប់ពីមានបទឈប់បាញ់កាលពីខែមេសា និងកិច្ចព្រមព្រៀងបឋមរវាងវ៉ាស៊ីនតោន និងតេហេរ៉ង់កាលពីខែមិថុនា។

ថ្លែងនៅឯពិធីយោធាមួយ លោក Israel Katz បានគូសបញ្ជាក់ថា «កងទ័ពបានត្រៀមខ្លួនរួចជាស្រេច និងប្រុងជើងការជាប់ជានិច្ច ដើម្បីបើកការប្រយុទ្ធជាថ្មីក្នុងគោលដៅក្ដោបក្ដាប់ឧត្តមភាពដែនអាកាស និងវាយប្រហារជាថ្មី...ក្នុងប្រទេសអ៉ីរ៉ង់ ដើម្បីកម្ចាត់ចោលការគំរាមកំហែង ក្នុងនោះរួមមានទាំងការវាយប្រហារជាលើកទី៣ ប្រសិនបើចាំបាច់»។ លោកបានបន្ថែមថាបើសម្រេចចិត្តថាត្រូវតែវាយប្រហារអ៉ីរ៉ង់ម្ដងទៀត នោះអ៉ីស្រាអែលនឹងវាយអ៉ីរ៉ង់ឱ្យទ្រោមខ្លួន។

គួរបញ្ជាក់ថា សង្រ្គាមអ៉ីរ៉ង់បានផ្ទុះឡើងដំបូងកាលពីថ្ងៃទី២៨ ខែកុម្ភៈ ឆ្នាំ២០២៦ នៅពេលដែលសហរដ្ឋអាមេរិក និងអ៉ីស្រាអែលបើកការវាយប្រហារតាមផ្លូវអាកាសលើអ៉ីរ៉ង់ ដោយសម្លាប់មេដឹកនាំកំពូលអ៉ីរ៉ង់ និងមន្ត្រីយោធាជាន់ខ្ពស់ជាច្រើននាក់។ ការវាយប្រហារនេះដែរគឺជាប្រតិបត្តិការយោធាជាលើកទី២របស់អ៉ីស្រាអែលប្រឆាំងនឹងអ៉ីរ៉ង់ បន្ទាប់ពីសង្រ្គាមរយៈពេល១២ថ្ងៃរវាងអ៉ីរ៉ង់ និងអ៉ីស្រាអែលកាលពីខែមិថុនា ឆ្នាំ២០២៥៕