(Ishigaki)៖ ព្យុះទីហ្វុងដ៏មានឥទ្ធិពល បានបោកបក់ទៅដល់កោះដាច់ស្រយាលមួយ នៅភាគនិរតីនៃប្រទេសជប៉ុន នាថ្ងៃសុក្រ ទី១០ ខែកក្កដា ឆ្នាំ២០២៦ ជំរុញឱ្យអាជ្ញាធរចេញការព្រមានអំពីខ្យល់ព្យុះ ភ្លៀងធ្លាក់ខ្លាំង បំណាក់ដី និងទឹកជំនន់ ហើយវាអាចជាព្យុះដ៏បំផ្លិចបំផ្លាញបំផុតមិនធ្លាប់មានក្នុងរយៈពេលច្រើនឆ្នាំ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

នៅព្រឹកថ្ងៃសុក្រ (ម៉ោងក្នុងតំបន់) ព្យុះទីហ្វុង Bavi កំពុងរំកិលទៅជិតកោះ Sakishima របស់ជប៉ុន ដែលជាកោះដាច់ស្រយាលមួយក្បែរកោះតៃវ៉ាន់ ជាមួយល្បឿនខ្យល់អតិបរមា ១៦២គីឡូម៉ែត្រក្នុងមួយម៉ោង នាំឱ្យប្រជាជនក្នុងតំបន់ប្រុងប្រយ័ត្នខ្ពស់ចំពោះផ្ទះសម្បែង និងហាងរបស់ពួកគេ។ ក្រុមហ៊ុនអាកាសចរណ៍ បានលុបចោលជើងហោះហើរជាច្រើននៅក្នុងតំបន់ រួមទាំងសម្រាប់ថ្ងៃសៅរ៍ផងដែរ។

នៅឯ ​Ishigaki ដែល​ជា​កោះ​មួយ​ក្នុង​ចំណោម​កោះ​ដ៏ពេញនិយម​ពីសំណាក់​ភ្ញៀវទេសចរ អ្នក​ស្រុក​បាន​ស្តុក​ទុក​សម្ភារ​ប្រើប្រាស់ ដោយ​លក់​មី​ឆ្អិន​ពេញ​ធ្នើរ​នៅ​តាមផ្សារ​ទំនើប​។ ឆ្នេរកម្សាន្ត ឧទ្យានឆ្នេរសមុទ្រ និងស្ថានីយស្រឡាងក្នុងស្រុក ប្រហែលជាត្រូវបិទ ដោយអ្នកខ្លះបានលើកឡើងពីការព្រួយបារម្ភផ្នែកសុវត្ថិភាព មុនការមកដល់នៃព្យុះ៕