(ហ្សឺណែវ)៖ រាប់ចាប់ពីរថយន្តដឹកទំនិញបញ្ជាពីចម្ងាយ សម្រាប់បម្រើដល់ការដឹកជំនួយសង្គ្រោះជីវិតក្នុងបរិយាកាសគ្រោះថ្នាក់ រហូតដល់ការវិភាគទិន្នន័យទូរស័ព្ទចល័តដើម្បីរកប្រជាជនដែលផ្លាស់ទីតាំងស្នាក់ ក្រុមផ្តល់មនុស្សធម៌កំពុងគិតគូរលើការប្រើប្រាស់បញ្ញាសិប្បនិម្មិត (AI) មកបង្កើនល្បឿន និងកែលម្អប្រតិបត្តិការរបស់ពួកគេ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃសុក្រ ទី១០ ខែកក្កដា ឆ្នាំ២០២៦។

ទោះជាមានការព្រមានច្រើនអំពីគ្រោះថ្នាក់នៃការប្រើ AI សម្រាប់ភ្នាក់ងារផ្តល់ជំនួយ ដែលអាចពាក់ព័ន្ធទិន្នន័យ ព័ត៌មានមិនពិតអំពីប្រតិបត្តិការ និងអ្នកទទួលជំនួយ ប៉ុន្តែនៅឯកិច្ចប្រជុំ AI for Good នាទីក្រុងហ្សឺណែវសប្តាហ៍នេះ ការតាំងពិពណ៌មួយចំនួនពាក់ព័ន្ធការងារមនុស្សធម៌ បានសង្កត់ធ្ងន់ទៅលើសក្តានុពលវិជ្ជមាននៃបច្ចេកវិទ្យា។

ផលិតនៅអ៊ុយក្រែន រថយន្ត SHERP គឺជាយានជំនិះដែលអាចអណ្តែតលើទឹក បើកបរឆ្លងកាត់វាលភក់ និងទឹកលិចដោយប្រើកង់យក្សរបស់វា ហើយវាអាចឡើងលើទួលកម្ពស់រហូតដល់ ១ម៉ែត្រ។ កម្មវិធីស្បៀងអាហារពិភពលោក (WFP) របស់អង្គការសហប្រជាជាតិ (UN) កំពុងសាកល្បងរថយន្តប្រភេទនេះ ដោយដំណើរការប្រើបច្ចេកវិទ្យា AI ដែលអាចបញ្ជាពីចម្ងាយឆ្លងកាត់កន្លែងដ៏គ្រោះថ្នាក់ និងលំបាកបំផុត។

ដំបូង WFP មានអ្នកបើកបររថយន្ត SHERP ដើម្បីផ្តល់ជំនួយនៅស៊ូដង់ ស៊ូដង់ខាងត្បូង និងអ៊ូហ្គង់ដា រួចហើយ ប៉ុន្តែក្រោយការបាត់បង់ជីវិតអ្នកបើកបរជាច្រើនលើកមក WFP បានប្រគល់ភារកិច្ចឱ្យមជ្ឈមណ្ឌលអវកាសអាល្លឺម៉ង់ (DLR) ជួយបំពាក់ AI និងបច្ចេកវិទ្យាផ្សេងទៀតនៅលើរថយន្តប្រភេទនេះ ដើម្បីអាចឱ្យវាត្រូវបានបញ្ជាពីចម្ងាយ។

តាមលោក Bernhard Kowatsch ប្រធានផ្នែកនវានុវត្តន៍សម្រាប់កម្មវិធីពន្លឿន និងគម្រោងវិនិយោគសកលនៃ WFP បច្ចេកវិទ្យា AI គួរតែអាចជួយឱ្យយើងអាចទៅដល់ក្រុមមនុស្ស ដែលជាធម្មតាមិនអាចទៅដល់។ ដោយឡែក លោក Armin Wedler ដែលកំពុងសម្របសម្រួលគម្រោងឧបករណ៍ជំនួយសង្គ្រោះបន្ទាន់មនុស្សធម៌ស្វយ័ត (AHEAD) របស់ DLR និយាយថា ការធ្វើតេស្តបានធ្វើឡើងក្នុងប្រទេសអាល្លឺម៉ង់ ហើយនឹងត្រូវសាកល្បងនៅលើវាលស្រែក្នុងប្រទេសអ៊ូហ្គង់ដា នាឆ្នាំ ២០២៨៕