(ស៉ីដនី)៖ នា​ថ្ងៃសុក្រ ទី១០ ខែកក្កដា ឆ្នាំ២០២៦នេះ រដ្ឋាភិបាលអូស្រ្តាលី ​បាន​ប្រកាសថា អ្នកវិទ្យាសាស្ត្រ​បាន​រកឃើញ​ជំងឺផ្តាសាយបក្សី H5 ដែល​អាចចម្លង​ខ្លាំង ​នៅក្នុងខ្លួនសត្វ​ស្លាប​សមុទ្រ​អូស្ត្រាលី​ ជា​លើកដំបូង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

ចាប់តាំងពីខែមិថុនា ជំងឺផ្តាសាយបក្សី H5 ចំនួន ១២ករណី ត្រូវរកឃើញនៅអូស្ត្រាលី ប៉ុន្តែកើតឡើងលើសត្វស្លាបសមុទ្រ ហើរមកពីខាងក្រៅ មិនមែនសត្វស្លាបក្នុងស្រុក។ រដ្ឋមន្ត្រីក្រសួងកសិកម្មអូស្រ្តាលី លោកស្រី Julie Collins ចាត់ទុកថាវាជាការវិវត្តន៍ដ៏គួរឱ្យព្រួយបារម្ភ ហើយមិននឹកស្មានដល់។ លោកស្រីបានឱ្យដឹងថា គ្មានសញ្ញាណាមួយបង្ហាញថា មេរោគនេះរីករាលដាលដល់សត្វដទៃទៀត បសុបក្សី ឬប្រព័ន្ធកសិកម្មទេ ហើយវានៅតែមានហានិភ័យទាប ចំពោះសុខភាពមនុស្ស។ បច្ចុប្បន្ន អ្នកវិទ្យាសាស្ត្រកំពុងព្យាយាមកំណត់ទិស ដែលអាចនាំការឆ្លងមេរោគទៅកាន់សត្វស្លាប ក្នុងប្រទេសអូស្ត្រាលី។

គួរបញ្ជាក់ថា អស់រយៈពេលច្រើនឆ្នាំមកហើយ អូស្ត្រាលីគឺជាទ្វីបតែមួយគត់ដែលមិនមានវីរុស H5 ដែលបង្កជាជំងឺធ្ងន់ធ្ងរ និងអត្រាងាប់កម្រិតខ្ពស់ចំពោះសត្វបសុបក្សី និងសត្វស្លាបព្រៃនៅទូទាំងពិភពលោក៕