(គីនស្ហាសា)៖ អាជ្ញាធរសុខាភិបាលប្រចាំទ្វីបអាហ្រ្វិក កាលពីថ្ងៃព្រហស្បតិ៍ ទី៩ ខែកក្កដា ឆ្នាំ២០២៦ បានប្រកាសថា ករណីឆ្លងរាលដាលជំងឺអេបូឡា នៅក្នុងប្រទេសសាធារណរដ្ឋប្រជាធិបតេយ្យកុងហ្គោ គឺជាការរីករាលដាលរហ័សជាងគេបំផុត ស្របពេលដែលអង្គការសុខភាពពិភពលោក WHO បាននិយាយថា ចំនួនមនុស្សស្លាប់បានកើនដល់៦០០នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

តួលេខថ្មីចុងក្រោយពី WHO បានបង្ហាញថា ឥឡូវចំនួនករណីជំងឺអេបូឡា ដែលត្រូវបានផ្ទៀងផ្ទាត់ច្បាស់លាស់នៅកុងហ្គោ មានចំនួនដល់១៧៥៩ករណី គិតចាប់តាំងពីការឆ្លងរាលដាល ត្រូវបានប្រកាសជាផ្លូវការ កាលពីពាក់កណ្តាលខែឧសភា ហើយក្នុងនោះរួមមានករណីស្លាប់៦០០នាក់។

លោក Wessam Mankoula ប្រធានទទួលបន្ទុកការត្រៀមលក្ខណៈនិងការឆ្លើយតបគ្រាអាសន្ន របស់មជ្ឈមណ្ឌលគ្រប់គ្រង​និងទប់ស្កាត់ជំងឺឆ្លងនៃទ្វីបអាហ្រ្វិក បានប្រាប់ក្រុមអ្នកសារព័ត៌មានដូច្នេះថា «នេះគឺជាការឆ្លងជំងឺអេបូឡាដែលរីករាលដាលលឿន​ជាងគេបង្អស់ មិនមែនត្រឹមក្នុងចំណោមវីរុសអេបូឡាអម្បូរ Bundibugyo ផ្ទាល់ប៉ុណ្ណោះទេ តែក្នុងចំណោមវីរុសនានាដែលបង្កជា​ជំងឺអេបូឡា។ ជាអកុសល វីរុសនេះនៅតែដើរលឿនជាងការឆ្លើយតបរបស់យើង។ វាកំពុងបោះជំហានយ៉ាងលឿន ជាងការដាក់ពង្រាយធនធាន ដើម្បីគ្រប់គ្រងស្ថានការណ៍»។ បើតាមលោក Mankoula ថវិកាសរុបខ្ទង់១,៤ពាន់លានដុល្លារ គឺត្រូវការចាំបាច់ សម្រាប់ការងារឆ្លើយតបចំពោះការឆ្លងរីករាលដាលជំងឺផ្ទាល់ ក៏ដូចជាសម្រាប់កិច្ចប្រឹងប្រែងមនុស្សធម៌។

គួរបញ្ជាក់ថា ការឆ្លងរាលដាលជំងឺអេបូឡាបច្ចុប្បន្ន គឺបង្កឡើងដោយវីរុស Bundibugyo ដែលជាវីរុសអេបូឡាអម្បូរកម្រ មិនទាន់មានវិធីព្យាបាលច្បាស់លាស់ ឬវ៉ាក់សាំងការពារនៅឡើយ។ ការចម្លងត្រូវគេជឿថា បានប្រព្រឹត្តទៅដោយគ្មាននរណាដឹង តាំងពីមុនពេលមានការប្រកាសផ្លូវការ។ ការឆ្លងរាលដាលនៅតំបន់ភាគឦសានប្រទេសកុងហ្គោ បានវាយលុកខេត្តសរុបចំនួន៤ ប៉ុន្តែផ្តោតខ្លាំងនៅខេត្ត Ituri៕