(ប៉ារីស)៖ អង្គការសុខភាពសត្វពិភពលោក (WOAH) បានប្រកាសនៅថ្ងៃសុក្រនេះថា ប្រទេសហ្វីលីពីនបានរាយការណ៍ពីការផ្ទុះឡើងនៃជំងឺផ្តាសាយបក្សីប្រភេទ H5N1 ដ៏កាចសាហាវ នៅក្នុងចំណោមបក្សីដែលប្រជាពលរដ្ឋចិញ្ចឹមនៅតាមផ្ទះ ក្នុងខេត្ត Oriental Mindoro។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ការរីករាលដាលនៃជំងឺផ្តាសាយបក្សីនេះ កំពុងបង្កឱ្យមានការព្រួយបារម្ភយ៉ាងខ្លាំងពីរដ្ឋាភិបាល និងអ្នកប្រកបរបរចិញ្ចឹមបក្សី បន្ទាប់ពីជំងឺនេះបានបំផ្លិចបំផ្លាញសត្វបក្សីរាប់លានក្បាលនៅជុំវិញពិភពលោកក្នុងរយៈពេលប៉ុន្មានឆ្នាំចុងក្រោយនេះ ដែលធ្វើឱ្យប៉ះពាល់ដល់ចង្វាក់ផ្គត់ផ្គង់ ជំរុញឱ្យតម្លៃស្បៀងអាហារឡើងថ្លៃ និងបង្កើនហានិភ័យនៃការឆ្លងមកកាន់មនុស្សផងដែរ។

ទីភ្នាក់ងារ WOAH ដែលមានមូលដ្ឋាននៅទីក្រុងប៉ារីស ដោយផ្អែកតាមរបាយការណ៍របស់អាជ្ញាធរហ្វីលីពីន បានបញ្ជាក់ថា វីរុស H5N1 នេះត្រូវបានរកឃើញនៅលើហ្វូងបក្សីចំនួន ៣៩ក្បាល នៅក្នុងទីប្រជុំជន Capalan។ ក្រោយការរកឃើញនេះ សត្វបក្សីទាំងអស់នោះត្រូវបានកម្ទេចចោលភ្លាមៗ ដើម្បីជាវិធានការការពារការរាលដាលជាបន្តបន្ទាប់៕