(ម៉ូស្គូ)៖ វិមានក្រឹមឡាំង បានឱ្យដឹងនៅថ្ងៃសុក្រថា ខ្លួនកំពុងពិភាក្សាថាតើគួរអនុញ្ញាតឱ្យប្រទេសតួកគី​ លក់ប្រព័ន្ធការពារមីស៊ីល S-400 ដែលផលិតដោយរុស្ស៊ីចេញឬយ៉ាងណា ចំពេលមានសេចក្តីរាយការណ៍ថា ទីក្រុងអង់ការ៉ា (Ankara) មានផែនការលក់ប្រព័ន្ធមីស៊ីលនេះចេញ ដើម្បីជាថ្នូរនឹងការដែលទីក្រុងវ៉ាស៊ីនតោន អនុញ្ញាតឱ្យខ្លួនអាចទិញយន្តហោះចម្បាំង F-35 របស់អាមេរិកបាន។ នេះបើតាមការចេញផ្សាយដោយបទីភ្នាក់ងារសារព័ត៌មាន AFP។

គួររំលឹកថា កាលពីឆ្នាំ២០១៩ តួកគីដែលជាសមាជិកអង្គការណាតូ (NATO) ត្រូវបានអាមេរិកដកចេញពីកម្មវិធីទិញយន្តហោះចម្បាំង F-35 បន្ទាប់ពីតួកគីបានទទួលប្រព័ន្ធការពារដែនអាកាស S-400 ពីរុស្ស៊ី ដែលជាប្រព័ន្ធសព្វាវុធដែលអាមេរិកបានព្រមានយ៉ាងច្បាស់កុំឱ្យទិញ។ កាលពីថ្ងៃសុក្រ សារព័ត៌មានគាំទ្ររដ្ឋាភិបាលតួកគី Hurriyet បានរាយការណ៍ថា ទីក្រុងអង់ការ៉ាបានលក់ប្រព័ន្ធ S-400 ទាំងនោះបន្តទៅឱ្យប្រទេសនៅតំបន់ឈូងសមុទ្រមួយរួចទៅហើយ។ ឆ្លើយតបនឹងរបាយការណ៍នេះ អ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ (Dmitry Peskov) បានបញ្ជាក់យ៉ាងខ្លីថា៖ «យើងធ្លាប់មានទំនាក់ទំនងជាមួយភាគីតួកគីជុំវិញបញ្ហានេះ ហើយយើងនឹងបន្តពិភាក្សាជាមួយពួកគេលើរឿងនេះបន្តទៀត»។

ការសម្រេចចិត្តទិញប្រព័ន្ធ S-400 ពីរុស្ស៊ីក្នុងឆ្នាំ២០១៧ បានកើតឡើងស្របពេលដែលទំនាក់ទំនងរវាងទីក្រុងអង់ការ៉ា និងវ៉ាស៊ីនតោន មានភាពរកាំរកូសជុំវិញសង្គ្រាមនៅស៊ីរី។ សកម្មភាពនេះបានរងការរិះគន់ពីសមាជិកណាតូផ្សេងទៀត និងបណ្តាលឱ្យអាមេរិកដាក់ទណ្ឌកម្មលើតួកគី ព្រមទាំងរារាំងមិនឱ្យតួកគីទទួលបានយន្តហោះ F-35 ដែលខ្លួនបានបង់ប្រាក់រួចហើយនោះទេ។

ទោះជាយ៉ាងណា ក្នុងជំនួបជាមួយប្រធានាធិបតីតួកគី លោក តៃយីប អេដូហ្គាន់ (Recep Tayyip Erdogan) កាលពីថ្ងៃអង្គារ ប្រធានាធិបតីអាមេរិក លោក ដូណាល់ ត្រាំ បានប្រកាសថា លោក «នឹងពិចារណា» អញ្ជើញតួកគីឱ្យចូលរួមក្នុងកម្មវិធី F-35 ឡើងវិញ ដោយលោកបានសរសើរតួកគីថាជាប្រទេសស្មោះត្រង់ និងបានសន្យាដកទណ្ឌកម្មចេញវិញផងដែរ។ ទោះបីជាមានការបើកផ្លូវពីអាមេរិកក្តី ប៉ុន្តែដើម្បីអាចលក់ប្រព័ន្ធ S-400 ទាំងនោះចេញបាន តួកគីចាំបាច់ត្រូវតែទទួលបានការយល់ព្រមពីប្រទេសរុស្ស៊ីជាមុនសិន ព្រោះខ្លួនមិនមានអាជ្ញាប័ណ្ណក្នុងការនាំចេញបន្តនោះឡើយ៕