(តេហេរ៉ង់)៖ ទីភ្នាក់ងារសារព័ត៌មានពាក់កណ្តាលរដ្ឋរបស់អ៊ីរ៉ង់ Tasnim បានរាយការណ៍ថា គណៈប្រតិភូរបស់ប្រទេសកាតា​ បានបំពេញទស្សនកិច្ចនៅប្រទេសអ៊ីរ៉ង់ នៅថ្ងៃសុក្រនេះ​ដែលសកម្មភាពនេះត្រូវបានគេជឿជាក់ថា ជាកិច្ចខិតខំប្រឹងប្រែងរបស់ទីក្រុងដូហា​ក្នុងការពង្រឹងតួនាទីរបស់ខ្លួនជាអ្នកសម្របសម្រួលសន្តិភាព បន្ទាប់ពីការកើនឡើងនៃអំពើហិង្សានាពេលថ្មីៗនេះនៅក្នុងតំបន់ឈូងសមុទ្រ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ទីភ្នាក់ងារសារព័ត៌មាន Tasnim បានបញ្ជាក់ថា ដំណើរទស្សនកិច្ចនេះ ធ្វើឡើងបន្ទាប់ពីមានការចោទប្រកាន់ពីសំណាក់កាតាមកលើអ៊ីរ៉ង់ ជុំវិញឧប្បត្តិហេតុនៅច្រកសមុទ្រហ័រមូស និងការវាយប្រហារបន្តបន្ទាប់ពីសំណាក់សហរដ្ឋអាមេរិក ទៅលើគោលដៅយោធា និងស៊ីវិលរបស់អ៊ីរ៉ង់។

ទន្ទឹមនឹងនេះ ប្រភពដែលដឹងពីបញ្ហានេះបានប្រាប់ Reuters នៅថ្ងៃសុក្រថា ក្រុមអ្នកចរចារបស់កាតាកំពុងជួបពិភាក្សាជាមួយមន្ត្រីអ៊ីរ៉ង់ ក្នុងគោលបំណងបន្ធូរបន្ថយភាពតានតឹង និងបង្កើតបរិយាកាសអំណោយផលសម្រាប់ការចរចាដ៏ទូលំទូលាយ។ ប្រភពដដែលបានបន្ថែមថា កិច្ចចរចា និងការសម្របសម្រួលនេះ គឺកំពុងត្រូវបានធ្វើឡើងដោយមានការសហការ និងសម្របសម្រួលយ៉ាងជិតស្និទ្ធជាមួយសហរដ្ឋអាមេរិកផងដែរ៕