(តៃប៉ិ)៖ អាជ្ញាធរកោះតៃវ៉ាន់ បានជម្លៀសប្រជាជនជាង ១៤០០០នាក់ ដែលភាគច្រើននៃពួកគេត្រូវបានជម្លៀសចេញពីតំបន់ភ្នំ ខណៈ ដែនកោះមួយនេះបានផ្អាកសកម្មភាពមួយចំនួន ដូចជាបិទសាលារៀនបណ្ដោះអាសន្ន និងលុបចោលជើងហោះហើរ ជាវិធានការបង្ការការពារទប់ទល់នឹងព្យុះទីហ្វុង Bavi ដែលត្រូវបានរំពឹងថានឹងនាំមកជាមួយនូវភ្លៀងធ្លាក់ និងខ្យល់បក់ខ្លាំង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ព្យុះទីហ្វុង Bavi ដែលបានថមថយចុះឥទ្ធិពលនឹងមិនបក់បោកវាយប្រហារដោយផ្ទាល់លើតំបន់ដីគោកនៃកោះតៃវ៉ាន់នោះទេ។ តែរដ្ឋាភិបាលតៃវ៉ាន់បានដាក់ចេញវិធានការបង្ការការពារអាយុជីវិតប្រជាជន និងបានព្យាករថាតំបន់ខ្លះអាចនឹងកម្រិតខ្ពស់ទឹកភ្លៀងជិតមួយម៉ែត្រ។ តាមអាជ្ញាធរតៃវ៉ាន់ ភាគច្រើននៃអ្នកត្រូវបានជម្លៀសគឺរស់នៅក្នុងតំបន់ភាគខាងជើង និងភាគខាងកើត ហើយជើងហោះហើរអន្តរជាតិចំនួន៩១៧ និងជើងហោះហើរក្នុងស្រុក ២៧៤ត្រូវបានលុបចោល។

ទីក្រុង និងតំបន់ស្ទើរទាំងកោះតៃវ៉ាន់បានអនុញ្ញាតឱ្យមានថ្ងៃឈប់សម្រាកមួយថ្ងៃ នៅថ្ងៃសៅរ៍ ទី១១ ខែកក្កដា ឆ្នាំ២០២៦ ដោយសាលារៀននិងការិយាល័យត្រូវបិទទ្វារ ជាបណ្ដោះអាសន្ន។

គួរបញ្ជាក់ថា បន្ទាប់ពីបក់បោកឆ្លងកាត់តៃវ៉ាន់ ព្យុះទីហ្វុង Bavi ត្រូវបានព្យាករថាអាចនឹងវាយប្រហារលើទីក្រុង Wenzhou ភាគខាងកើតប្រទេសចិនដែលមានប្រជាជន ១០លាននាក់រស់នៅ នៅព្រឹកថ្ងៃអាទិត្យចុងសប្ដាហ៍នេះ៕