(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃសុក្រ ទី១០ ខែកក្កដា ឆ្នាំ២០២៦ បាននិយាយថាសហរដ្ឋអាមេរិក និងអ៉ីរ៉ង់បានឯកភាពគ្នាបន្តកិច្ចចរចា តទៅទៀត បើទោះជាមានការកើនឡើងជម្លោះសាជាថ្មីក្នុងពេលប៉ុន្មានថ្ងៃមកនេះក៏ដោយ ប៉ុន្តែលោកបានទទូចថាកិច្ចព្រមព្រៀងបទឈប់បាញ់ជាមួយតេហេរ៉ង់កាលពីខែមិថុនាបានដល់ទីបញ្ជាប់ហើយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

សហរដ្ឋអាមេរិកក៏កំពុងបង្កើនការទាមទារឱ្យអ៉ីរ៉ង់បញ្ឈប់ការវាយប្រហារលើកប៉ាល់ដឹកទំនិញក្នុងតំបន់ច្រកសមុទ្រ Hormuz ផងដែរជាទីដែលអរិភាពបានផ្ទុះឡើងប៉ុន្មានថ្ងៃមកនេះធ្វើឱ្យតម្លៃប្រេងឡើងថ្លៃដែលជាបញ្ហាដ៏រសើបមួយសម្រាប់លោក ត្រាំ នៅមុនការបោះឆ្នោតពាក់កណ្ដាលអាណត្តិរបស់សហរដ្ឋអាមេរិកនៅខែវិច្ឆិកាខាងមុខ។ ការអត្ថាធិប្បាយរបស់លោក ត្រាំ ធ្វើឡើងចំពេលមានភាពស្ងប់ស្ងាតឡើងវិញ ដោយកាលពីថ្ងៃសុក្រមិនមានការវាយប្រហារថ្មីមួយត្រូវបានរាយការណ៍នោះទេ ស្របពេលក្រុមអ្នកសម្របសម្រួលក្នុងតំបន់ កំពុងព្យាយាមស្វែងរកដំណោះស្រាយការទូតដើម្បីបិទបញ្ចប់ជាអចិន្ត្រៃយ៍នៃសង្រ្គាមដែលបានផ្ទុះឡើងតាមរយៈការវាយប្រហាររបស់សហរដ្ឋអាមេរិក និងអ៉ីស្រាអែលលើអ៉ីរ៉ង់ កាលពីថ្ងៃទី២៨ ខែកុម្ភៈ។

នៅក្នុងការបង្ហោះលើបណ្ដាញទំនាក់ទំនងសង្គម Truth Social លោក ត្រាំ បានគូសបញ្ជាក់ដូច្នេះថា «សាធារណរដ្ឋអ៉ីស្លាមអ៉ីរ៉ង់ បានស្នើសុំពួកយើងឱ្យបន្តកិច្ចចរចា។ យើងបានយល់ព្រមធ្វើដូច្នោះ ប៉ុន្តែសហរដ្ឋអាមេរិកបានបញ្ជាក់ប្រាប់ទៅពួកគេថាបទឈប់បាញ់បានដល់ទីបញ្ចប់ហើយ»។ ជាការឆ្លើយតបទៅនឹងការលើកឡើងរបស់លោក ត្រាំ អ៉ីរ៉ង់បានអះអាងថាខ្លួនមិនបានសុំសហរដ្ឋអាមេរិកចរចាឡើយ ប៉ុន្តែបានយល់ព្រមជួបពិភាក្សាជាមួយក្រុមអ្នកសម្របសម្រួលមកពីកាតាក្នុងទីក្រុងតេហេរ៉ង់។ នេះបើតាមប្រព័ន្ធផ្សព្វផ្សាយរដ្ឋ អ៉ីរ៉ង់ ដោយផ្អែកលើការស្រង់សម្ដីពីអ្នកនាំពាក្យម្នាក់នៃក្រសួងការបរទេសអ៉ីរ៉ង់។ ក្រុមអ្នកសម្របសម្រួលមកពីកាតាបានទៅដល់ទីក្រុងតេហេរ៉ង់ កាលពីថ្ងៃសុក្រដើម្បីសាកល្បងបន្ធូរបន្ថយភាពតានតឹង និងពិភាក្សាពីការធ្វើនាវាចរឆ្លងកាត់តាមច្រកសមុទ្រ Hormuz។

គួរបញ្ជាក់ថា បន្ទាប់ពីអះអាងថាអ៉ីរ៉ង់បានវាយប្រហារលើកប៉ាល់ដឹកទំនិញ ៣គ្រឿងក្នុងតំបន់ច្រកសមុទ្រ Hormuz សហរដ្ឋអាមេរិកបានបើកការវាយប្រហារលើទីក្រុងចំនួន៦ របស់អ៉ីរ៉ង់ ២យប់ជាប់ៗគ្នាកាលពីថ្ងៃពុធ និងថ្ងៃព្រហស្បតិ៍សប្ដាហ៍នេះ។ តាមការបញ្ជាក់ពីក្រុមមន្ត្រីអ៉ីរ៉ង់ មនុស្សយ៉ាងហោច ១៧នាក់ត្រូវបានសម្លាប់ក្នុងការវាយប្រហាររបស់សហរដ្ឋអាមេរិក និង១១៥នាក់បានរងរបួស។ អ៉ីរ៉ង់វិញបានសងសឹកដោយបើកការវាយប្រហារលើមូលដ្ឋានទ័ពអាមេរិកនៅក្នុងតំបន់ឈូងសមុទ្រ៕