(ការ៉ាកាស)៖ រដ្ឋាភិបាលវ៉េណេស៊ុយអេឡា បានឱ្យដឹងនៅថ្ងៃសុក្រ ទី១០ ខែកក្កដា ឆ្នាំ២០២៦ ថាចំនួនអ្នកស្លាប់ដោយសារគ្រោះរញ្ជួយដីដ៏ប្រល័យ បានកើនឡើងលើស ៤០០០នាក់ហើយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅក្នុងការបង្ហោះមួយលើបណ្ដាញទំនាក់ទំនងសង្គម Telegram ប្រធានរដ្ឋសភាវ៉េណេស៊ុយអេឡា លោក Jorge Rodriguez បានឱ្យដឹងថាគិតត្រឹមថ្ងៃសុក្រ មានមនុស្សយ៉ាងហោច ៤១១៨នាក់បានស្លាប់ និង១៦ ៧៤០នាក់បានរងរបួសក្នុងគ្រោះរញ្ជួយដីកម្រិតធ្ងន់ចំនួន២លើក ៧,២ និង៧,៥រ៉ិចទ័រដែលបានវាយប្រហារលើវ៉េណេស៊ុយអេឡា ក្នុងពេលគម្លាតពីគ្នាត្រឹមប៉ុន្មានវិនាទីប៉ុណ្ណោះកាលពីថ្ងៃទី២៤ ខែមិថុនាកន្លងទៅ។

មនុស្សរាប់ពាន់នាក់ក៏ត្រូវបានរាយការណ៍ថាបានបាត់ខ្លួនផងដែរ។ មកទល់នឹងពេលនេះ ទោះបីជាក្រុមអ្នកជួយសង្រ្គោះបានបញ្ឈប់ការតាមស្វែងរកអ្នកនៅរស់រានមានជីវិតក៏ដោយ ក៏សមាជិកក្រុមគ្រួសារជាច្រើននៅតែបន្តតាមស្វែងរកមនុស្សជាទីស្រឡាញ់របស់ពួកគេ ក្នុងក្ដីសង្ឃឹមថាយ៉ាងហាចណាស់ពួកគេអាចរកឃើញសាកសពសាច់ញាតិរបស់ខ្លួនយកទៅបញ្ចុះឱ្យបានត្រឹមត្រូវ។

គួរបញ្ជាក់ថា កាលពីថ្ងៃសុក្រសប្ដាហ៍នេះ ការរញ្ជួយដីកម្រិត ៣,០រ៉ិចទ័របានកើតឡើងក្នុងភាគកណ្ដាលនៃរដ្ឋធានីការ៉ាកាស ដោយបង្កការឱ្យមានការភ័យខ្លាច និងមនុស្សម្នានាំគ្នាសម្រុករត់ចេញពីអគារ។ ដោយឡែក កាលពីថ្ងៃពុធ អង្គការសហប្រជាជាតិបានអំពាវនាវឱ្យស្វែងរកជំនួយជាបន្ទាន់ជិត ៣០០លានដុល្លារដើម្បីជួយដល់ប្រតិបត្តិការផ្ដល់ជំនួយ និងស្ដារការខូចខាតបង្កឡើងដោយគ្រោះរញ្ជួយដីនៅវ៉េណេស៊ុយអេឡា៕