(Reuters)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃសុក្រ ទី១០ ខែកក្កដា ឆ្នាំ២០២៦ (ម៉ោងនៅសហរដ្ឋអាមេរិក) បាននិយាយថាលោកបានបញ្ជាឱ្យយោធាត្រៀមលក្ខណៈរួចជាស្រេចដើម្បីបើកការវាយប្រហារលើអ៉ីរ៉ង់ ប្រសិនបើរដ្ឋាភិបាលអ៉ីរ៉ង់ធ្វើសកម្មភាព ឬប៉ុនប៉ងធ្វើឃាតប្រធានាធិបតីអាមេរិក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក ដូណាល់ ត្រាំ ធ្វើការកត់សម្គាល់បែបនេះក្នុងការបង្ហោះមួយលើបណ្ដាញទំនាក់ទំនងសង្គម ​Truth Social និងបន្ទាប់ពីមានសេចក្ដីរាយការណ៍ថាអ៉ីស្រាអែលបានចែករំលែកព័ត៌មានស៊ើបការណ៍សម្ងាត់ជាមួយសហរដ្ឋអាមេរិកអំពីផែនការថ្មីមួយរបស់អ៉ីរ៉ង់ដើម្បីសម្លាប់លោក ត្រាំ។ លោក ត្រាំ ក្នុងការបង្ហោះនោះបានគូសបញ្ជាក់ថា «មីស៊ីល ១០០០គ្រាប់ ត្រៀមរួចជាស្រេចដើម្បីបាញ់តម្រង់ទៅរកអ៉ីរ៉ង់ ហើយរាប់ពាន់គ្រាប់ទៀតត្រៀមទុកបាញ់ទៅតាមក្រោយ ប្រសិនបើរដ្ឋាភិបាលអ៉ីរ៉ង់ធ្វើសកម្មភាពដើម្បីធ្វើឃាត​ ឬប៉ុនប៉ងធ្វើឃាតប្រធានាធិបតីកំពុងកាន់អំណាចរបស់សហរដ្ឋអាមេរិក ដែលក្នុងករណីនេះគឺរូបខ្ញុំ»។

បើតាមលោក ត្រាំ យោធាអាមេរិកទទួលបានបញ្ជាពីរូបលោករួចជាស្រេច ដើម្បីត្រៀមកម្ទេចអ៉ីរ៉ង់ឱ្យក្លាយទៅជាផេះ ប្រសិនបើមានរឿងអ្វីកើតឡើងចំពោះលោកមែននោះ។

គួរបញ្ជាក់ថា ប្រព័ន្ធផ្សព្វផ្សាយអាមេរិកបានរាយការណ៍ នៅថ្ងៃព្រហស្បតិ៍ ទី៩ ខែកក្កដា ឆ្នាំ២០២៦ ថាអ៉ីស្រាអែលបានចែករំលែកព័ត៌មានសម្ងាត់ជាមួយសហរដ្ឋអាមេរិក ក្នុងសប្ដាហ៍នេះ អំពីផែនការថ្មីមួយ និងមានភាពជាក់លាក់របស់អ៉ីរ៉ង់ដើម្បីធ្វើឃាតលោកប្រធានាធិបតី ដូណាល់ ត្រាំ។ CNN ដោយផ្អែកលើប្រភពមិនបញ្ជាក់អត្តសញ្ញាណបានឱ្យដឹងថាវ៉ាស៊ីនតោន បាន និងកំពុងតាមដានយ៉ាងជាប់លាប់លើព័ត៌មានសម្ងាត់អំពីផែនការធ្វើឃាតលោកប្រធានាធិបតី ត្រាំ។ ប៉ុន្តែការព្រមាននៅពេលនេះរបស់អ៉ីស្រាអែលគឺជាផែនការថ្មី និងមានភាពជាក់លាក់ ជាងពេលមុនៗ។

Wall Street Journal ដោយផ្អែកលើប្រភពដែលខ្លួនទទួលបាន ក៏បានរាយការណ៍ពីផែនការថ្មីរបស់អ៉ីរ៉ង់ដើម្បីធ្វើឃាតលោក ត្រាំ ផងដែរ។ ទីក្រុងតេហេរ៉ង់បានសន្យាជាច្រើនឆ្នាំ មកហើយថានឹងសងសឹកលោក ត្រាំ ចំពោះការបញ្ជាឱ្យយោធាអាមេរិកសម្លាប់អតីតមេបញ្ជាការអ៉ីរ៉ង់ លោក Qassem Soleimani កាលពីខែមករា ឆ្នាំ២០២០ ពោលគឺចាប់តាំងពីអាណត្តិទី១របស់លោកមកម្ល៉េះ៕