(ប៉េកាំង)៖ ប្រទេសចិនបានជម្លៀសមនុស្សជាង ១,៨លាននាក់នៅថ្ងៃសៅរ៍នេះ ខណៈព្យុះទីហ្វុង Bavi បោកបក់ឆ្ពោះទៅកាន់ភាគខាងកេីតទីក្រុង Wenzhou បន្ទាប់ពីបង្កឱ្យមានភ្លៀងធ្លាក់ជោគជាំ និងខ្យល់បោកបក់កោះ Sakishima ភាគខាងត្បូងជប៉ុន ព្រមទាំងបោកបក់ឆ្លងកាត់ភាគខាងជើងនៃកោះតៃវ៉ាន់។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសៅរ៍ ទី ១១ ខែកក្កដា ឆ្នាំ២០២៦។

មជ្ឈមណ្ឌលឧតុនិយមជាតិចិន បានឱ្យដឹងថា ព្យុះ Bavi មានល្បឿនខ្យល់អតិបរមា ១៤៤គីឡូម៉ែត្រក្នុងមួយម៉ោង ហើយស្ថិតនៅចម្ងាយប្រហែល ២០០គីឡូម៉ែត្រ ភាគអាគ្នេយ៍នៃទីក្រុង Wenling ក្នុងខេត្ត Zejiang ភាគខាងកើត។

តាមការព្យាករណ៍ ព្យុះនេះនឹងបោកបក់ចូលដល់ដីគោកនៅទីក្រុង Wenzhou ដែលជាមានប្រជាជនប្រមាណ ១០លាននាក់ នាព្រឹកថ្ងៃអាទិត្យ។ ប្រព័ន្ធផ្សព្វផ្សាយរដ្ឋចិនបានរាយការណ៍ថា មនុស្សជាង ១,៧លាននាក់ត្រូវបានជម្លៀសចេញនៅទូទាំងខេត្ត Zhejiang ជាទីដែលទីក្រុង Wenzhou ស្ថិតនៅ និងជាង ១០០ ០០០នាក់នៅក្នុងខេត្ត Fujian ដែលនៅជាប់នោះ។

គួរបញ្ជាក់ថា ស្របពេលជប៉ុន និងតៃវ៉ាន់​ មិនទាន់រាយការណ៍ពីករណីស្លាប់ណាមួយដោយសារព្យុះទីហ្វុងនេះ តែមនុស្ស ១៧នាក់បានស្លាប់នៅក្នុងប្រទេសហ្វីលីពីន ដោយសារតែភ្លៀងធ្លាក់ខ្លាំងបណ្តាលមកពីខ្យល់មូសុងនិរតីដែលកាន់តែអាក្រក់ទៅៗដោយឥទ្ធិពលនៃព្យុះ Bavi៕