(ការ៉ាកាស)៖ តួលេខថ្មីចុងក្រោយបង្អស់ បានបង្ហាញថា ចំនួនមនុស្សដែលបានបាត់បង់ជីវិត ក្នុងគ្រោះមហន្តរាយរញ្ជួយដីដ៏អាក្រក់នៅប្រទេសវ៉េណេស៊ុយអេឡា កាលពីខែមិថុនា បានបន្តកើនលើស៤៣០០នាក់ហើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអាទិត្យ ទី១២ ខែកក្កដា ឆ្នាំ២០២៦។

ប្រធានរដ្ឋសភាវ៉េណេស៊ុយអេឡា លោក Jorge Rodriguez ដែលត្រូវជាបងប្រុសមេដឹកនាំស្តីទីលោកស្រី Delcy Rodriguez បានឱ្យដឹងថា ចំនួនមនុស្សស្លាប់ គិតត្រឹមថ្ងៃសៅរ៍ បានបន្តឡើងដល់៤៣៣៣នាក់ កើនពីចំនួន៤១១៨នាក់ កាលពីថ្ងៃសុក្រ។ លោក Rodriguez មិនបានប្រាប់ឡើយថា ចំនួនមនុស្សប៉ុន្មាននាក់ ដែលនៅបន្តបាត់ខ្លួន ប៉ុន្តែបើតាមការប៉ាន់ប្រមាណរបស់អង្គការសហប្រជាជាតិ គឺអាចមាន ៥០ ០០០នាក់។ បើតាមលោក Rodriguez ប្រជាជនច្រើនជាង ១៩ ០០០នាក់ កំពុងបន្តស្នាក់នៅតាមជំរំបណ្តោះអាសន្ន សម្រាប់គ្រួសារដែលបានបាត់បង់ផ្ទះសម្បែង។

គួរបញ្ជាក់ថា កាលពីថ្ងៃទី២៤ ខែមិថុនា គ្រោះរញ្ជួយដីពីរផ្ទួនគ្នា មួយមានកម្រិត៧,២រ៉ិចទ័រ និងមួយទៀតកម្រិត៧,៥រ៉ិចទ័រ បានវាយប្រហាររដ្ឋធានីការ៉ាកាស និង​រដ្ឋ La Guairá នៃប្រទេសវ៉េណេស៊ុយអេឡា បង្កការបំផ្លិចបំផ្លាញយ៉ាងធ្ងន់ធ្ងរ៕