(ឡុងដ៍)៖ ប្រទេសអាល្លឺម៉ង់ បានសម្រេចផ្តល់មូលនិធិទិញដ្រូនវាយប្រហារចំនួន ៥០,០០០គ្រឿង ឱ្យទៅប្រទេសអ៊ុយក្រែន ដែលនេះគឺជាការបញ្ជាទិញទ្រង់ទ្រាយធំបំផុតមួយពីលោកខាងលិច ដើម្បីជួយគាំទ្រដល់ទីក្រុងកៀវ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ការបញ្ជាទិញនេះគឺផ្តោតលើដ្រូនប្រយុទ្ធធុនស្រាលប្រភេទ FPV ម៉ូដែល Shrike ផលិតដោយក្រុមហ៊ុនអ៊ុយក្រែន SkyFall។ អ្វីដែលពិសេសនោះគឺ ដ្រូនទាំងនេះត្រូវបានបំពាក់ដោយសូហ្វវែរ (Software) របស់ក្រុមហ៊ុនបច្ចេកវិទ្យាអាមេរិក Auterion ដែលមានសមត្ថភាពអាចតាមដាន និងវាយប្រហារគោលដៅចល័តដោយស្វ័យប្រវត្តិ។

នាយកប្រតិបត្តិក្រុមហ៊ុន Auterion បានបញ្ជាក់ថា កិច្ចសន្យានេះមានតម្លៃប្រមាណ ៩០លានអឺរ៉ូ (១០៣លានដុល្លារ) ហើយដ្រូនមួយចំនួនត្រូវបានប្រគល់ឱ្យអ៊ុយក្រែនរួចរាល់ហើយ ខណៈចំនួនដែលនៅសល់នឹងបញ្ជូនទៅឱ្យអស់ក្នុងឆ្នាំនេះ។ ចំណែកក្រុមហ៊ុន SkyFall ក៏បានទទួលស្គាល់ពីការពាក់ព័ន្ធរបស់អាល្លឺម៉ង់ដែរ ប៉ុន្តែបដិសេធមិនផ្តល់ព័ត៌មានលម្អិត ខណៈក្រសួងការពារជាតិអាល្លឺម៉ង់ និងអ៊ុយក្រែន សុំមិនធ្វើអត្ថាធិប្បាយជុំវិញរឿងនេះឡើយ ដើម្បីរក្សាការសម្ងាត់យោធា។

គួររំលឹកថា ក្នុងរយៈពេលជាង ៤ឆ្នាំនៃសង្គ្រាមប្រឆាំងនឹងរុស្ស៊ី អ៊ុយក្រែនបានពឹងផ្អែកយ៉ាងខ្លាំងលើការប្រើប្រាស់ដ្រូន ដោយបច្ចុប្បន្នអ៊ុយក្រែនមានសមត្ថភាពផលិតដ្រូនរាប់លានគ្រឿងក្នុងមួយឆ្នាំៗ ដើម្បីធ្វើការវាយប្រហាររាប់ពាន់លើកជារៀងរាល់ថ្ងៃ៕