(ព្រុចសែល)៖ បណ្តាប្រទេសក្នុងតំបន់អឺរ៉ុប បានរាយការណ៍ពីករណីស្លាប់ជាង ១០ ០០០ករណី អំឡុងពេលមានរលកកម្តៅខ្ពស់បំផុត ដែលបានបញ្ចេញឥទ្ធិពលនៅប៉ែកខាងលិចនៃទ្វីប កាលពីចុងខែមិថុនា។ នេះបើយោងតា​មការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី១៣ ខែកក្កដា ឆ្នាំ២០២៦។

EuroMOMO ដែលជាទីភ្នាក់ងារមួយ គាំទ្រដោយមជ្ឈមណ្ឌលបង្ការ និងតាមដានជំងឺឆ្លងអឺរ៉ុប (European Centre for Disease Prevention and Control) និងអង្គការសុខភាពពិភពលោក (WHO) បានបញ្ចេញរបាយការណ៍ថា ភាគច្រើនលើសលប់នៃអ្នកស្លាប់គឺជាង ៩ ០០០នាក់ ស្ថិតក្នុងចំណោមក្រុមមនុស្សមានអាយុចាប់ពី ៦៥ឆ្នាំឡើងទៅ។

រលកកម្តៅខ្លាំងអាចសម្លាប់មនុស្ស តាមរយៈការបណ្តាលឱ្យមានជំងឺដាច់សរសៃឈាមខួរក្បាល ឬធ្វើទុកសរសៃឈាមបេះដូង និងផ្លូវដង្ហើមធ្ងន់ធ្ងរ ហើយមនុស្សចាស់ងាយរងគ្រោះបំផុត។ លោក Lasse Vestergaard ប្រធានក្រុមគ្រូពេទ្យនៃវិទ្យាស្ថាន Statens Serum របស់ដាណឺម៉ាក ប្រាប់ Reuters ថាតួលេខក្នុងឆ្នាំនេះពិតជាខ្ពស់ណាស់ ហើយវាពិបាកពន្យល់ថាអត្រាមរណភាពហួសប្រមាណនេះ គឺគ្មានអ្វីក្រៅពីកត្តាអាកាសធាតុក្តៅខ្លាំង។

អ្នកវិទ្យាសាស្ត្រនិយាយថា រលកកម្តៅនាចុងខែមិថុនាមិនអាចកើតឡើងទេ ប្រសិនបើគ្មានបម្រែបម្រួលអាកាសធាតុដែលបង្កឡើងដោយមនុស្ស និងដែលបានកំពុងធ្វើឱ្យមានរលកកម្តៅកាន់តែញឹកញាប់ ជាមួយឥទ្ធិពលខ្លាំង។ តាមទិន្នន័យ​ដែល​ប្រមូល​ផ្តុំ​ចេញពី​ស្ថិតិ​មរណភាព​ជាតិ​ ក្នុង​ប្រទេស​ចំនួន ២៧ នៅ​អឺរ៉ុប ការស្លាប់កើតមានឡើងក្នុងសប្តាហ៍​ថ្ងៃទី២២ ដល់​ថ្ងៃទី២៨ ខែមិថុនា ជាពេលដែល​សីតុណ្ហភាពក្នុងប្រទេស​បារាំង អេស្ប៉ាញ អង់គ្លេស និង​ប្រទេស​ដទៃទៀត ​ឡើងដល់​កម្រិត​កំពូល​៕