(មូស្គូ)៖ មន្រ្តីរុស្ស៉ីបានអះអាងថា ការវាយប្រហារដោយយន្តហោះដ្រូនរបស់អ៊ុយក្រែន បានសម្លាប់មនុស្ស៤នាក់ និងបង្កឱ្យរបួស ៧នាក់ នៅក្នុងប្រទេសរុស្ស៉ី ហើយភាគច្រើននៅតំបន់រដ្ឋធានីមូស្គូ ខណៈទីក្រុងកៀវបន្តបង្កើនការវាយប្រហាឆ្លើយតប ចំពោះ​ការបាញ់ស្រោចមីស៉ីលនិងដ្រូនរបស់រុស្ស៉ី ទៅលើប្រទេសរបស់ខ្លួន អំឡុងសង្រ្គាមដែលអូសបន្លាយរយៈពេលប្រមាណជា៤ឆ្នាំ​កន្លះមកហើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃចន្ទ ទី១៣ ខែកក្កដា ឆ្នាំ២០២៦។

អភិបាលតំបន់មូស្គូ លោក Andrey Vorobyov បានអះអាងបន្ថែមថា យន្តហោះដ្រូនសរុប៨១គ្រឿង ត្រូវបានបាញ់ទម្លាក់​នៅលើតំបន់របស់លោក ប៉ុន្តែទោះជាបែបនេះក៏ដោយ មនុស្សសរុប៣នាក់បានបាត់បង់ជីវិត និង៥នាក់បានទទួលរងរបួស។ ដោយឡែកនៅឯតំបន់ Belgorod ដែលស្ថិតជាប់ព្រំប្រទល់ជាមួយអ៊ុយក្រែន ស្រ្តីម្នាក់បានស្លាប់ ក្នុងការវាយប្រហារដ្រូននៅក្រុង Berezovka និងបុរស២នាក់បានរងរបួស នៅតំបន់ Krinichnoye។ លើសពីនេះ ការវាយប្រហារដោយដ្រូន ក៏បានបង្កជាអគ្គិភ័យនៅសួនឧស្សាហកម្ម នៃតំបន់ Stavropol ភាគខាងត្បូងផងដែរ។

ប៉ុន្មានខែមកនេះ អ៊ុយក្រែនបាននិងកំពុងខិតខំបង្កើនការវាយប្រហារលើរុស្ស៉ី ជាពិសេសគោលដៅហេដ្ឋារចនាសម្ព័ន្ធថាមពល ដែលទីក្រុងអះអាងថា គឺជាសកម្មភាពសងសឹកស្មើភាពគ្នា សម្រាប់ការដែលរុស្ស៉ីបានវាយប្រហារទឹកដីរបស់ខ្លួន អំឡុងសង្រ្គាមឈ្លានពានជាង៤ឆ្នាំមកនេះ។

គួរបញ្ជាក់ថា នាថ្ងៃចន្ទនេះ បណ្តាសម្ព័ន្ធមិត្តរបស់អ៊ុយក្រែន នឹងជួបជុំគ្នានៅទីក្រុងប៉ារីសនៃប្រទេសបារាំង ដើម្បីពិភាក្សាអំពី​ការដាក់សម្ពាធបន្ថែមឱ្យរុស្ស៉ីបិទបញ្ចប់សង្រ្គាមរបស់ខ្លួន។ កិច្ចប្រឹងប្រែងការទូតដឹកនាំដោយសហរដ្ឋអាមេរិក ដើម្បីបញ្ចប់ជម្លោះនេះ បានជាប់គាំងជាច្រើនខែមកហើយ ស្របពេលដែលទីក្រុងវ៉ាស៉ីនតោន បានបង្វែរការផ្តោតសំខាន់ទៅ​លើជម្លោះរបស់ខ្លួនផ្ទាល់ជាមួយប្រទេសអ៉ីរ៉ង់ ដែលផ្ទុះឡើងកាលពីខែកុម្ភៈ ហើយមកទល់ពេលនេះ មិនទាន់អាចរកផ្លូវបញ្ចប់​ទៅវិញជាស្ថាពរនៅឡើយទេ៕