(តូក្យូ)៖ នាថ្ងៃចន្ទ ទី១៣ ខែកក្កដា ឆ្នាំ២០២៦ ជប៉ុនបាននិយាយថា ខ្លួនទទួលស្គាល់ពីចាំបាច់ដើម្បីទប់ស្កាត់ឱ្យប្រសើរជាងមុន ចំពោះសកម្មភាពចារកម្មរបស់បរទេស នៅក្នុងទឹកដីរបស់ខ្លួន បន្ទាប់ពីសារព័ត៌មានអាមេរិក New York Times (NYT) បានរាយការណ៍ថា រុស្ស៉ីបានប្រែក្លាយប្រទេសអាស៉ីមួយនេះ ទៅជាសំបុកធ្វើចារកម្ម និងជាប្រភពដ៏សំខាន់មួយ នៃគ្រឿងបង្គុំសព្វាវុធ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្នុងអត្ថបទស្រាវជ្រាវមួយ ចេញផ្សាយកាលពីថ្ងៃអាទិត្យកន្លងទៅនេះ NYT បានរាយការណ៍ថា ដោយសារតែច្បាប់ចារកម្មដែល​មានលក្ខណៈទន់ខ្សោយ ទីក្រុងមូស្គូបានប្រើប្រាស់ជប៉ុន ធ្វើជាមជ្ឈមណ្ឌលសំខាន់មួយ សម្រាប់ការប្រមូលព័ត៌មានសម្ងាត់ និង​ការទិញយកបច្ចេកវិទ្យាប្រើប្រាស់ពីរយ៉ាង ដែលចាំបាច់សម្រាប់សង្រ្គាមរបស់ខ្លួននៅអ៊ុយក្រែន។

អ្នកនាំពាក្យរដ្ឋាភិបាលជប៉ុន លោក Minoru Kihara បាននិយាយយ៉ាងដូច្នេះថា «យើងទទួលស្គាល់ថា នៅក្នុងបរិយាកាសសន្តិសុខ ដែលមានការប្រែប្រួលយ៉ាងឆាប់រហ័ស គឺវាមានភាពចាំបាច់កាន់តែខ្លាំង ដើម្បីទប់ទល់សកម្មភាពចារកម្មរបស់បរទេស ដូចជាការប្រមូលយកព័ត៌មានសំខាន់ៗ ដែលគំរាមកំហែងសន្តិសុខជាតិរបស់ជប៉ុន»។ ដោយមិននិយាយពាក់ព័ន្ធផ្ទាល់ទៅនឹងសេចក្តីរាយការណ៍របស់កាសែតអាមេរិក លោក Kihara បានប្រាប់ក្រុមអ្នកព័ត៌មានថា ទីក្រុងតូក្យូចាំបាច់ត្រូវដោះស្រាយបញ្ហានេះ ជាមួយការយកចិត្តទុកដាក់ និងប្រុងប្រយ័ត្នខ្លាំងជាងមុន។

សេចក្តីរាយការណ៍របស់ NYT បានផ្អែកលើការប៉ាន់ស្មានរបស់រដ្ឋាភិបាលអ៊ុយក្រែន ដែលថាខ្ទង់៩០ភាគរយនៃមីស៉ីលនិងដ្រូន​របស់រុស្ស៉ី គឺផ្ទុកគ្រឿងបង្គុំមកពីប្រទេសជប៉ុន ហើយប្រតិបត្តិការរបស់រុស្ស៉ីនៅជប៉ុន ត្រូវបានដឹកនាំដោយបុគ្គលឈ្មោះ Maksim Vladimirovich Filchenkov ដែលជាភ្នាក់ងារចារកម្មរុស្ស៉ី ធ្វើការជាសម្ងាត់នៅការិយាល័យ របស់ក្រុមហ៊ុនអាកាសចរណ៍រុស្ស៉ី Aeroflot ប្រចាំទីក្រុងតូក្យូ។

NYT បានបន្ថែមថា ដោយសារការចាំចេញផ្ទាល់ទៅកាន់រុស្ស៉ី ត្រូវបានហាមឃាត់ បណ្តាញទិញលួចលាក់ បានប្រើប្រាស់​ក្រុមហ៊ុនជាឈ្មួញកណ្តាល និងប្រទេសទី៣ ដូចជាវៀតណាម អ៊ូសបេគីស្ថាន និងស្រីលង្កា ជាដើម ដើម្បីផ្លាស់ទីគ្រឿងបង្គុំទាំងនោះ ​ចូលទៅកាន់ប្រទេសរុស្ស៉ី៕