(សេអ៊ូល)៖ នៅថ្ងៃអាទិត្យ ទី១៣ ខែកក្កដា ឆ្នាំ២០២៦ ប្រទេសកូរ៉េខាងត្បូង បានព្រមានអំពីរលកកម្តៅជាលើកដំបូង គិតចាប់តាំងពីប្រព័ន្ធប្រកាសអាសន្នថ្មីមួយ ត្រូវបានចាប់ផ្តើមប្រើប្រាស់ក្នុងឆ្នាំនេះ ដោយអាជ្ញាធរបានណែនាំដល់ប្រជាជន ឱ្យកាត់បន្ថយការធ្វើសកម្មភាពខាងក្រៅ ហើយស្ថិតនៅតែក្នុងកន្លែងត្រជាក់។ នេះបើយោងតាមការចេញផ្សាយដោយសារព័ត៌មាន AFP។

ក្រុមមន្ត្រី​និយាយ​ថា ប្រព័ន្ធ​ប្រកាសអាសន្នថ្មីខាងលើ ត្រូវ​បានដាក់ឱ្យប្រើប្រាស់ ​​ដើម្បី​ដោះស្រាយបាន​កាន់​តែ​ប្រសើរ​ ពាក់ព័ន្ធនឹងបញ្ហា​រលក​កម្ដៅ​ដែល​កំពុង​កើនឡើង​ ក្នុង​ប្រទេស ដែលអូសបន្លាយ​​យូរ ហើយចេះតែក្តៅឡើងៗ។ ការប្រកាសអាសន្នមួយបានចេញ នៅពេលដែលតំបន់មួយចំនួន ដែលកំពុងជួបប្រទះរលកកម្តៅ ត្រូវបានព្យាករថាសីតុណ្ហភាពនឹងឡើងដល់ ៣៨អង្សាសេ ដោយពេល ឬសីតុណ្ហភាព ៣៩អង្សាសេ ក្នុងរយៈពេលពេញមួយថ្ងៃ។ លោកស្រី Lee Mi-seon ប្រធានទីភ្នាក់ងារឧតុនិយមកូរ៉េខាងត្បូង ណែនាំដល់អ្នកចូលរួមសកម្មភាពនានា នៅខាងក្រៅគួរតែឈប់ភ្លាមៗ ហើយផ្លាស់ទៅកន្លែងត្រជាក់ ហើយថាមិនគួរទុកកុមារ ឬសត្វចិញ្ចឹម ចោលនៅក្នុងរថយន្តឡើយ។

គួរបញ្ជាក់ថា តំបន់ភាគច្រើននៃប្រទេសកូរ៉េខាងត្បូង រួមទាំងផ្នែកខ្លះនៃទីក្រុងសេអ៊ូល នៅតែស្ថិតក្រោមការព្រមានពីរលកកម្តៅ ដោយមានសីតុណ្ហភាពចន្លោះ ៣៥អង្សាសេ ឬខ្ពស់ជាងនេះ អស់រយៈពេលពីរថ្ងៃជាប់ៗគ្នាមកហើយ៕