(ប៉ារីស)៖ ប្រធានាធិបតីបារាំង លោក អេម៉ានុយអែល ម៉ាក្រុង នៅថ្ងៃចន្ទនេះ បានប្រកាសយ៉ាងមុតមាំថា ទ្វីបអឺរ៉ុបបានត្រៀមខ្លួនរួចជាស្រេច ដើម្បីការពារខ្លួន និងសេរីភាព ទោះបីជាត្រូវប្តូរដោយ «ឈាម» ក៏ដោយ ប្រសិនបើចាំបាច់។ ការអះអាងនេះ ធ្វើឡើងនៅមុនកិច្ចប្រជុំកំពូលជាមួយសម្ព័ន្ធមិត្ត ដើម្បីបញ្ជាក់ជំហរគាំទ្រអ៊ុយក្រែន និងដាក់សម្ពាធលើរុស្ស៊ី។ នេះបើតាមការចេញផ្សាយដោយទីភ្នាក់ងារសារព័ត៌មាន​ AFP។

ការិយាល័យប្រធានាធិបតីបារាំងបានឱ្យដឹងថា កិច្ចប្រជុំកំពូលនៃ «សម្ព័ន្ធឆន្ទៈ» ដែលផ្តួចផ្តើមដោយបារាំង និងអង់គ្លេស នឹងមានការចូលរួមពីប្រមុខរដ្ឋយ៉ាងហោចណាស់ ២៥រូប រួមទាំងប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី ផងដែរ ដើម្បីជំរុញឱ្យមានបទឈប់បាញ់ និងការចរចាសន្តិភាពនៅអ៊ុយក្រែន។

ថ្លែងសុន្ទរកថាជាប្រពៃណីទៅកាន់កងកម្លាំងប្រដាប់អាវុធ មុនក្បួនព្យុហយាត្រាយោធាថ្ងៃទី១៤ ខែកក្កដា លោក ម៉ាក្រុង បានសង្កត់ធ្ងន់ថា អឺរ៉ុបកំពុង «ស្ថិតក្នុងដំណើរការប្រែក្លាយទៅជាមហាអំណាចមួយ» ដែលត្រៀមខ្លួនរួចជាស្រេចដើម្បី «ការពារខ្លួន»។ លោកបានបញ្ជាក់ថា «សារដែលយើងចង់ផ្ញើទៅកាន់ពិភពលោកគឺ៖ បាទ សន្តិភាពគឺជាគោលដៅរបស់យើង។ ពិតណាស់ យើងឱ្យតម្លៃលើសេរីភាព និងនីតិរដ្ឋ។ ហើយពិតណាស់​ យើងត្រៀមខ្លួនជាស្រេចក្នុងការប្រយុទ្ធដើម្បីការពាររឿងទាំងនោះ។ ជានិច្ចកាល ហើយទោះបីជាត្រូវប្តូរដោយឈាមក៏ដោយ ប្រសិនបើចាំបាច់»។

គួរបញ្ជាក់ថា​ លោក ហ្សេឡេនស្គី និងមេដឹកនាំដទៃទៀត ត្រូវបានរំពឹងថានឹងចូលរួមទស្សនាក្បួនព្យុហយាត្រានៅតាមដងវិថី Champs-Elysees ចំកណ្តាលទីក្រុងប៉ារីស ដែលនឹងរំលេចពីការគាំទ្រយ៉ាងរឹងមាំចំពោះអ៊ុយក្រែន។ ក្រៅពីនេះ លោក ម៉ាក្រុង ក៏បានឆ្លៀតឱកាសអំពាវនាវឱ្យមានភាពជាដៃគូក្នុងឧស្សាហកម្មការពារជាតិអឺរ៉ុបបន្ថែមទៀត បើទោះបីជាបារាំង និងអាល្លឺម៉ង់ ទើបតែបានបោះបង់ចោលកម្មវិធីអភិវឌ្ឍន៍យន្តហោះចម្បាំងរួមគ្នាកាលពីខែមុនក៏ដោយ៕