(ប៉េកាំង)៖ ការនាំចេញរបស់ចិន បានកើនឡើងក្នុងខែមិថុនា ជំរុញដោយតម្រូវការបន្ទះឈីប និងឧបរកណ៍ផ្ទុកទិន្នន័យ សម្រាប់យកទៅប្រើក្នុងការជំរុញបច្ចេកវិទ្យាបញ្ញាសិប្បនិម្មិត (AI) ទូទាំងពិភពលោក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី១៤ ខែកក្កដា ឆ្នាំ២០២៦។

ភាពធន់នៃពាណិជ្ជកម្មជាងការរំពឹងទុក បង្ហាញថាក្រុមហ៊ុនផលិតចិន នៅតែបន្តរក្សាបាននូវការលក់ ទោះជាមានកំណើនយឺតនៅក្នុងប្រទេសមានសេដ្ឋកិច្ចធំៗ និងភាពមិនប្រាកដប្រជានៃទំនាក់ទំនងពាណិជ្ជកម្ម ជាមួយទីក្រុងវ៉ាស៉ីនតោនក៏ដោយ។ តម្រូវការខ្លាំងសម្រាប់ផលិតផលបច្ចេកវិទ្យា ទាក់ទងនឹង AI កុងត្រាដឹកជញ្ជូនទំនិញទៅកាន់សហរដ្ឋអាមេរិកទុកមុន និងការកំណត់តម្លៃពីអ្នកនាំចេញរបស់ចិន បានជួយគាំទ្រដល់ការលក់នៅក្រៅប្រទេស។

យោងតាមទិន្នន័យគយចិន ការនាំចេញបានកើនឡើង ២៧ភាគរយធៀបនឹងឆ្នាំមុន គិតជាប្រាក់ដុល្លារអាមេរិក ដែលជាលទ្ធផលល្អបំផុតក្នុងរយៈពេល ៤ខែ ដោយលើសពីការកើនឡើង ១៩,៤ភាគរយក្នុងខែឧសភា និងការព្យាករកំណើន ១៨,២ភាគរយពីក្រុមអ្នកសេដ្ឋកិច្ច។ ដោយឡែក ទិន្នន័យសកម្មភាពផលិតកម្ម ក្នុងខែមិថុនា ក៏បានបង្ហាញដែរថា តម្រូវការនៅបរទេសកំពុងចាប់ផ្តើមងើបឡើងវិញ។

គួរបញ្ជាក់ថា ការវិនិយោគលើវិស័យ AI ជាសកល កំពុងផ្តល់ផលដ៏សំខាន់សម្រាប់ក្រុមហ៊ុនផលិត ដែលរួមចំណែក ២០ទ្រីលានដុល្លារនៅក្នុងសេដ្ឋកិច្ចចិន ទោះជាមានការរំខានខ្លះពីជម្លោះនៅមជ្ឈិមបូព៌ា និងការធ្លាក់ចុះនៃវិស័យអចលនទ្រព្យ៕