លោក Xi Jinping ប្រធានរដ្ឋចិន អញ្ជើញចូលរួមពិធីបើកកិច្ចប្រជុំបញ្ញាសិប្បនិម្មិតពិភពលោកឆ្នាំ២០២៦ និងកិច្ចប្រជុំកម្រិតខ្ពស់ស្តីពីអភិបាលកិច្ចបញ្ញាសិប្បនិម្មិតសកលព្រមទាំងថ្លែងសុន្ទរកថាគន្លឹះ
18-07-2026 16:20
(ប៉េកាំង)៖ នៅថ្ងៃទី ១៧ ខែកក្កដា កិច្ចប្រជុំបញ្ញាសិប្បនិម្មិតពិភពលោកឆ្នាំ ២០២៦ និងកិច្ចប្រជុំកម្រិតខ្ពស់ស្តីពីអភិបាលកិច្ចបញ្ញាសិប្បនិម្មិតសកលបានប្រារព្ធធ្វើនៅទីក្រុងសៀងហៃ ។ លោក Xi Jinping ប្រធានរដ្ឋចិនបានអញ្ជើញចូលរួមពិធីបើកព្រមនិងថ្លែងសុន្ទរកថាគន្លឹះក្រោមចំណងជើងថា«ពួតដៃគ្នាកសាងប្រព័ន្ធអភិបាលកិច្ចបញ្ញាសិប្បនិម្មិតសកល ដែលយុត្តិធម៌និងសមហេតុផល» ។
លោក Xi Jinping បានលើកឡើងថា បច្ចុប្បន្ននេះ ពិភពលោកបាននិងកំពុងស្ថិតក្នុងបម្រែបម្រួលនិម្មាបនកម្មដ៏ខ្លាំងដែលមិនធ្លាប់មានក្នុងរយៈពេល ១ រយឆ្នាំកន្លងមក បដិវត្តន៍វិទ្យាសាស្ត្រនិងបច្ចេកវិទ្យានិងការធ្វើនវានុវត្តន៍ខាងឧស្សាហកម្មជុំថ្មី កំពុងពន្លឿនជំហានទៅមុខ ហើយការច្នៃប្រឌិតថ្មីផ្នែកបច្ចេកវិទ្យានៃបញ្ញាសិប្បនិម្មិតសកលកំពុងឈានចូលក្នុងដំណាក់កាលអភិវឌ្ឍន៍ថ្មីដែលមិនធ្លាប់មានកាលពីមុន វាបានបង្កប់នូវកាលានុវត្តភាពដ៏ធំធេងផង ហើយក៏ប្រឈមមុខនឹងបញ្ហាអភិបាលកិច្ចផងដែរ ។ ភាគីចិនសម្គាល់ឃើញថា បណ្តាប្រទេសនានាគួរប្រកាន់ខ្ជាប់នូវទស្សនៈអំពីការតម្កល់ទុកមនុស្សជាអាទិភាពនិងអភិវឌ្ឍAIក្នុងផ្លូវសុចរិតដើម្បីឱ្យAIក្លាយជាប្រភពកម្លាំងចលករដ៏សំខាន់មួយសម្រាប់ការជំរុញវិបុលភាពរួមនិងគាំពារសន្តិសុខរួម ក៏ដូចជាពួតដៃគ្នាកសាងប្រព័ន្ធអភិបាលកិច្ចបញ្ញាសិប្បនិម្មិតសកលដែលយុត្តិធម៌និងសមហេតុផល ។
លោក Xi Jinping បានលើកឡើងនូវសំណើ ៤ ចំណុច៖ ទីមួយ ប្រកាន់ខ្ជាប់ការបើកទូលាយនិងឈ្នះ-ឈ្នះនិងជំរុញការអភិវឌ្ឍប្រកបដោយភាពច្នៃប្រឌិតថ្មី ។ ទីពីរ ពង្រឹងការយល់ដឹងខាងហានិភ័យដើម្បីធានាបាននូវសុវត្ថិភាពដែលអាចគ្រប់គ្រងបាន ។ ទីបី ធ្វើការងារទាំងផ្នែកលើកទឹកចិត្តនិងបរិយាបន្នដើម្បីជំរុញការរៀនសូត្រពីគ្នាខាងអរិយធម៌ ។ ទីបួន ផ្តួចផ្តើមឱ្យប្រកាន់ខ្ជាប់ការរួមសាមគ្គីគ្នា និងធ្វើឱ្យអភិបាលកិច្ចសកលមានសុក្រឹតភាព ។
លោក Xi Jinping បានសង្កត់ធ្ងន់ថា ក្នុងនាមជាប្រទេសធំដែលមានទំនួលខុសត្រូវ ជានិច្ចកាល ចិនតែងតែខិតខំប្រឹងប្រែងធ្វើជាអ្នកផ្តល់ផលិតផលសាធារណៈក្នុងវិស័យបញ្ញាសិប្បនិម្មិតសកលដើម្បីរួមចំណែកជាផែនការចិនឥតឈប់ឈរ ។
លោក Kassym-Jomart Tokayev ប្រធានាធិបតីកាហ្សាក់ស្ថាន សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា លោក អនុទីន នាយករដ្ឋមន្ត្រីថៃនិងលោក Antonio Guterres អគ្គលេខាធិការអង្គការសហប្រជាជាតិបានថ្លែងសុន្ទរកថាដោយឡែកពីគ្នាដោយវាយតម្លៃខ្ពស់ចំពោះការរួមចំណែកដ៏សំខាន់របស់ប្រទេសចិនក្នុងការជំរុញអភិបាលកិច្ចបញ្ញាសិប្បនិម្មិតសកលព្រមទាំងឆ្លើយតបយ៉ាងសកម្មចំពោះគំនិតផ្តួចផ្តើមនិងវិធានការដែលបានលើកឡើងដោយលោក Xi Jinping ប្រធានរដ្ឋចិន ។
សូមបញ្ជាក់ថា កិច្ចប្រជុំនេះបានចេញផ្សាយ «សេចក្តីថ្លែងការណ៍របស់ប្រធាននៃកិច្ចប្រជុំបញ្ញាសិប្បនិម្មិតពិភពលោកឆ្នាំ ២០២៦ និងកិច្ចប្រជុំកម្រិតខ្ពស់ស្តីពីអភិបាលកិច្ចបញ្ញាសិប្បនិម្មិតសកល»៕
វិទ្យុមិត្តភាពកម្ពុជាចិន
