(តេហេរ៉ង់)៖ នាថ្ងៃសៅរ៍ ទី១៨ ខែកក្កដា ឆ្នាំ២០២៦ អ៉ីរ៉ង់បានបើកការវាយប្រហារបន្ថែមទៀតទៅលើសម្ព័ន្ធមិត្តរបស់ទីក្រុងវ៉ាស៉ីនតោននៅក្នុងតំបន់ឈូងសមុទ្រ បន្ទាប់ពីសហរដ្ឋអាមេរិកបើកការវាយប្រហារជាបន្តបន្ទាប់អស់រយៈពេល ៧យប់មកហើយ ដោយកំណត់គោលដៅលើទីតាំងយោធារបស់អ៉ីរ៉ង់ រួមទាំងកន្លែងផ្គត់ផ្គង់ផ្នែកភស្តុភារ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។

រោងចក្រចម្រោះទឹកប្រៃមួយកន្លែងនៅក្នុងប្រទេសកូវ៉ែតបានរងការវាយប្រហារ ខណៈប្រតិបត្តិការនៅអាកាសយានដ្ឋានអន្តរជាតិកូវ៉ែតត្រូវផ្អាក ដោយសារតែការគំរាមកំហែងពីការបាញ់មីស៉ីល និងយន្តហោះដ្រូនជាញឹកញាប់។ កងកម្លាំងឆ្មាំបដិវត្តន៍អ៉ីរ៉ង់ IRGC ប្រកាសថាពួកគេបានវាយប្រហារមជ្ឈមណ្ឌលគាំទ្រប្រតិបត្តិការយោធារបស់សហរដ្ឋអាមេរិកនៅឯមូលដ្ឋាន Camp Arifjan និងបានបំផ្លាញស្ថានីយរ៉ាដាមួយកន្លែងនៅឯមូលដ្ឋានទ័ពអាកាស Ali Al Salem ក្នុងប្រទេសកូវ៉ែត។

ប្រព័ន្ធផ្សព្វផ្សាយរដ្ឋអ៉ីរ៉ង់ រាយការណ៍ថា IRGC ក៏បានកំណត់គោលដៅវាយប្រហារលើទីតាំងមួយនៅប្រទេសបារ៉ែន ដែលជាកន្លែងចតយន្តហោះចម្បាំងរបស់សហរដ្ឋអាមេរិកនៅមូលដ្ឋានទ័ពអាកាស Sheikh Isa និងមជ្ឈមណ្ឌលទិន្នន័យស៉េីបការណ៍សម្ងាត់ផងដែរ។ តាមទូរទស្សន៍រដ្ឋអ៉ីរ៉ង់ IRGC ក៏បានអះអាងពីការធ្វេីឱ្យខូចខាតយន្តហោះចម្បាំងអាមេរិក ២គ្រឿង និងយន្តហោះផ្សេងទៀតចំនួន ៣គ្រឿងផងដែរ ក្នុងអំឡុងការវាយប្រហារដោយមីស៉ីល និងដ្រូនលើមូលដ្ឋានទ័ពអាមេរិកក្នុងតំបន់ Al Azraq ប្រទេសហ្ស៊កដានី នាថ្ងៃសៅរ៍នេះ។

Reuters មិនអាចផ្ទៀងផ្ទាត់សេចក្តីរាយការណ៍ទាំងនោះបានទេ។ ភាពតានតឹងរវាងទីក្រុងវ៉ាស៉ីនតោន និងទីក្រុងតេហេរ៉ង់កំពុងកេីនឡេីង ចាប់តាំងពីកិច្ចព្រមព្រៀងបទឈប់បាញ់ដួលរលំកាលពីសប្តាហ៍មុន ដែលបង្កើនលទ្ធភាពនៃការវិលត្រឡប់ទៅរកសង្គ្រាមពេញលេញ៕