(ហាណូយ)៖ ប្រព័ន្ធផ្សព្វផ្សាយរដ្ឋបានរាយការណ៍ ថា មនុស្សយ៉ាងហោចណាស់ ៤នាក់បានស្លាប់ និង ៤នាក់ផ្សេងទៀតបានបាត់ខ្លួន បន្ទាប់ពីទឹកជំនន់ភ្លាមៗវាយប្រហារភូមិមួយនៅតំបន់ភ្នំ ក្នុងខេត្ត Lai Chau ភាគខាងជើងប្រទេសវៀតណាម។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសៅរ៍ ទី១៨ ខែកក្កដា ឆ្នាំ២០២៦។

ទឹកជំនន់នៅភូមិ Muong Than បានកេីតឡេីងកាលពីព្រឹកថ្ងៃសុក្រ បន្ទាប់ពីមានភ្លៀងធ្លាក់ខ្លាំងជាច្រើនថ្ងៃនៅក្នុងតំបន់មួយចំនួននៃភាគខាងជើងប្រទេសវៀតណាម ហេីយក៏បានបណ្តាលឱ្យមនុស្ស ៧នាក់រងរបួស។

ទីភ្នាក់ងារគ្រប់គ្រងគ្រោះមហន្តរាយរដ្ឋ បានឱ្យដឹងថា ចាប់តាំងពីថ្ងៃពុធមក ការរអិលបាក់ដី និងទឹកជំនន់ភ្លាមៗដែលបង្កឡើងដោយភ្លៀងធ្លាក់ខ្លាំង បានបង្កការខូចខាតដល់ផ្លូវថ្នល់ បណ្តាញអគ្គិសនី និងផ្ទះសម្បែងរាប់រយខ្នង ព្រមទាំងធ្វើឱ្យដំណាំទំហំ ២៣៨ហិកតា នៅក្នុងតំបន់នោះលិចលង់ផងដែរ។

តាមការព្យាករ តំបន់មួយចំនួននៅភាគខាងជើងប្រទេសវៀតណាម នឹងមានភ្លៀងធ្លាក់ដល់កម្រិត ២៥០មីលីម៉ែត្រនៅថ្ងៃសៅរ៍នេះ ហេីយមានអំពីហានិភ័យនៃទឹកជំនន់ភ្លាមៗ និងការបាក់ដីបន្ថែមទៀត។

គួរបញ្ជាក់ថា វៀតណាម ងាយរងគ្រោះដោយព្យុះ និងទឹកជំនន់ដែលបង្កគ្រោះថ្នាក់ដល់អាយុជីវិត អំឡុងរដូវវស្សាដែលមានសភាពខ្លាំងក្លាបំផុត ចាប់ពីខែកក្កដា ដល់ខែកញ្ញា។ ឆ្នាំមុនគ្រោះមហន្តរាយធម្មជាតិ ដែលភាគច្រើនជាទឹកជំនន់ បានបណ្តាលឱ្យមនុស្ស ៤៨៩នាក់បាត់បង់ជីវិត៕