(វ៉ាស៊ីនតោន)៖ សហរដ្ឋអាមេរិក នៅថ្ងៃសៅរ៍ ទី១៨ ខែកក្កដា ឆ្នាំ២០២៦ បានប្រកាសថាខ្លួនបានបើកការវាយប្រហារតាមផ្លូវអាកាសថ្មីមួយលើអ៉ីរ៉ង់ ជាការសងសឹកទៅនឹង ការវាយប្រហារលើកងកម្លាំងអាមេរិកក្នុងប្រទេសហ្ស៊កដានី បន្ទាប់ពីមានសេចក្ដីរាយការណ៍ពីទាហានអាមេរិកស្លាប់ជាលើកដំបូង​ចាប់តាំងសង្រ្គាមឡើងផ្ទុះឡើងវិញ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ទីបញ្ជាការកណ្ដាលរបស់សហរដ្ឋអាមេរិក ហៅកាត់ថា CENTCOM បានឱ្យដឹងនៅលើបណ្ដាញទំនាក់ទំនងសង្គម X ថាការវាយប្រហារតាមផ្លូវអាកាសមានគោលដៅបំបាក់សមត្ថភាពរបស់អ៉ីរ៉ង់កុំឱ្យបន្តគំរាមកំហែងដល់កប៉ាល់ដឹកទំនិញក្នុងតំបន់ច្រកសមុទ្រ Hormuz និងជាការសងសឹកទៅនឹងកងកម្លាំងឆ្មាំបដិវត្តន៍អ៉ីរ៉ង់ដែលបានបើកវាយប្រហារ ប្រឆាំងនឹងកងកម្លាំងអាមេរិកក្នុងប្រទេសហ្ស៊កដានីកាលពីថ្ងៃសុក្រ។

ទីភ្នាក់ងារសារព័ត៌មានអ៉ីរ៉ង់ Fars និង Tasnim បានរាយការណ៍ដំណាលគ្នាពីការវាយប្រហាររបស់សហរដ្ឋអាមេរិកលើទីក្រុង Sirik ជាទីក្រុងកំពង់ផែមួយស្ថិតនៅក្នុង តំបន់ច្រកសមុទ្រ Hormuz នៃភាគខាងត្បូងអ៉ីរ៉ង់។

តាម CENTCOM ទាហានអាមេរិក២នាក់បានស្លាប់ ហើយនេះជាលើកដំបូងបំផុតដែលទាហានអាមេរិកបានស្លាប់ចាប់តាំងពីសង្រ្គាមផ្ទុះឡើងជាថ្មីកាលពីថ្ងៃទី៧ ខែកក្កដាមក ខណៈទាហានអាមេរិកម្នាក់ទៀតបានបាត់ខ្លួន អំឡុងការវាយប្រហារដោយមីស៊ីល និងដ្រូនរបស់អ៉ីរ៉ង់ក្នុងប្រទេសហ្ស៊កដានីកាលពីថ្ងៃសុក្រ៕