(តេហេរ៉ង់)៖ មេដឹកនាំកំពូលអ៉ីរ៉ង់ លោក Mojtaba Khamenei បានព្រមានថាសហរដ្ឋអាមេរិកនឹងទទួលរងការឈឺចាប់ពីមេរៀនមួយដែលមិនអាចបំផ្លាញបាននៅក្រោមថ្វីដៃរបស់អ៉ីរ៉ង់ និងសម្ព័ន្ធមិត្តរបស់អ៉ីរ៉ង់នៅក្នុងតំបន់ ជាមួយការចោទប្រកាន់ថាសហរដ្ឋអាមេរិករំលោភបំពានម្ដងហើយម្ដងទៀតលើអនុស្សារណយោគយល់ (MoU) រវាងប្រទេសទាំង២។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ក្នុងសេចក្ដីថ្លែងការណ៍សរសេរដោយដៃ និងត្រូវបានចេញផ្សាយដោយប្រព័ន្ធផ្សព្វផ្សាយរដ្ឋអ៉ីរ៉ង់ នៅថ្ងៃសៅរ៍ ទី១៨ ខែកក្កដា ឆ្នាំ២០២៦ លោក Mojtaba Khamenei បាននិយាយថាការរំលោភបំពានរបស់សហរដ្ឋអាមេរិកលើ MoU ដែលបានឈានដល់កាលពីខែមិថុនា បានបង្ហាញថាហត្ថលេខារបស់លោកប្រធានាធិបតី ដូណាល់ ត្រាំ គឺគ្មានន័យ និងសុពលភាពអ្វីទាំងអស់។ «ឥលូវ សហរដ្ឋអាមេរិកកំពុងព្យាយាមដុតបញ្ឆេះសង្រ្គាម ហើយទទួលរងការខាតបង់ដ៏ធ្ងន់ធ្ងរ និងកាន់តែរងភាពអាម៉ាស ក៏ដូចជាគួរតែដឹងអ៉ីរ៉ង់ និងសម្ព័ន្ធមិត្តរបស់អ៉ីរ៉ងក្នុងតំបន់ នឹងផ្ដល់មេរៀនមិនអាចបភ្លេចបានដល់ពួកគេ ប្រសិនបើពួកគេនៅតែបន្តការវាយប្រហារ»។ នេះបើតាមលោក Mojtaba Khamenei។

គួរបញ្ជាក់ថា សហរដ្ឋអាមេរិកបាន និងកំពុងបង្កើនការវាយប្រហារតាមផ្លូវអាកាសលើអ៉ីរ៉ង់ក្នុងពេលប៉ុន្មានថ្ងៃមកនេះ តាមរយៈការកំណត់គោលដៅវាយប្រហារលើហេដ្ឋារចនាសម្ព័ន្ធ ស៊ីវិល ក្នុងនោះរួមមានទាំងស្ពាន ផ្លូវដែក និងរោងចក្រចម្រាញ់ទឹកប្រៃទៅជាទឹកសាប។ អ៉ីរ៉ង់បានសងសឹកវិញដោយបង្កើនការវាយប្រហារលើមូលដ្ឋានទ័ពអាមេរិក ក្នុងប្រទេសឈូងសមុទ្ររួមមានកូវ៉ែត បារ៉ែន និងហ្ស៊កដានីជាទីដែលទាហានអាមេរិក ២នាក់បានស្លាប់ក្នុងការវាយប្រហាររបស់អ៉ីរ៉ង់កាលពីថ្ងៃសុក្រ៕