(ហ្ស៊េរុយសាឡឹម)៖ មន្ត្រីយោធាអ៊ីស្រាអែលបានឱ្យដឹងនៅថ្ងៃអាទិត្យថា ប្រទេសអ៊ីស្រាអែលកំពុងត្រៀមទទួលយកយន្តហោះចាក់ប្រេងតាមអាកាសបន្ថែមទៀតពីសហរដ្ឋអាមេរិក ស្របពេលដែលការវាយប្រហាររវាងអាមេរិក និងអ៊ីរ៉ង់បានកើនឡើងយ៉ាងខ្លាំងក្នុងសប្តាហ៍កន្លងទៅនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

កិច្ចព្រមព្រៀងបទឈប់បាញ់បណ្តោះអាសន្នដែលបានចុះហត្ថលេខាកាលពីខែមុន បានដួលរលំ ដែលបង្កឱ្យមានការប៉ះទង្គិចគ្នាជាថ្មី និងបង្កក្តីបារម្ភអំពីការវិលត្រឡប់ទៅរកសង្គ្រាមពេញទំហឹង។ ទោះជាយ៉ាងណា អ៊ីស្រាអែលមិនបានចូលរួមក្នុងការវាយប្រហារចុងក្រោយរបស់អាមេរិកនេះទេ។ មន្ត្រីអ៊ីស្រាអែលបានបញ្ជាក់ថា អាមេរិកបានសម្រេចចិត្តកែសម្រួលកម្លាំងរបស់ខ្លួននៅក្នុងតំបន់ ដោយបញ្ជូនយន្តហោះចាក់ប្រេងរាប់សិបគ្រឿងបន្ថែមទៀត មកពង្រឹងកងហោះហើរដែលកំពុងឈរជើងនៅអ៊ីស្រាអែលស្រាប់។

យោងតាមសារព័ត៌មាន Axios រដ្ឋបាលលោក ដូណាល់ ត្រាំ​ បានជូនដំណឹងដល់អ៊ីស្រាអែលអំពីការបញ្ជូនយន្តហោះទាំងនេះ ដើម្បីត្រៀមលក្ខណៈសម្រាប់ការពង្រីកប្រតិបត្តិការយោធាប្រឆាំងនឹងអ៊ីរ៉ង់ដែលអាចកើតមាន។ ដើម្បីកាត់បន្ថយការរំខានដល់ជើងហោះហើរស៊ីវិល អាមេរិកបានសម្រេចចិត្តបែងចែកការឈរជើងយន្តហោះទាំងនេះ នៅតាមមូលដ្ឋានកងទ័ពអាកាសអ៊ីស្រាអែល និងអាកាសយានដ្ឋានពាណិជ្ជកម្ម។

គួររំលឹកថា ចាប់តាំងពីសង្គ្រាមបានផ្ទុះឡើងនៅចុងខែកុម្ភៈមក អាមេរិកបានដាក់ពង្រាយយន្តហោះចាក់ប្រេងជាច្រើនគ្រឿងនៅអ៊ីស្រាអែលរួចមកហើយ។ កាលពីខែឧសភា អគ្គនាយកអាជ្ញាធរអាកាសចរណ៍អ៊ីស្រាអែល បានត្អូញត្អែរថា សកម្មភាពយោធារបស់អាមេរិកបានធ្វើឱ្យអាកាសយានដ្ឋានអន្តរជាតិ Ben Gurion ដែលជាច្រកទ្វារអាកាសចម្បងរបស់អ៊ីស្រាអែល ត្រូវរាំងស្ទះប្រតិបត្តិការរហូតដល់ ៧០ភាគរយ ទើបអាមេរិកយល់ព្រមប្តូរយន្តហោះមួយចំនួនទៅកាន់មូលដ្ឋានកងទ័ពអាកាសវិញ។ គិតត្រឹមចុងខែមិថុនា អាមេរិកមានយន្តហោះយោធាសរុបចំនួន ៩៨គ្រឿង កំពុងឈរជើងនៅក្នុងប្រទេសអ៊ីស្រាអែល៕