(ទីក្រុងគូវ៉ែត)៖ កងទ័ពកូវ៉ែត និងបារ៉ែន នៅថ្ងៃអាទិត្យនេះបានប្រកាសថា ប្រព័ន្ធការពារដែនអាកាសរបស់ពួកគេ កំពុងសកម្មក្នុងការស្ទាក់ចាប់មីស៊ីល និងដ្រូនរបស់អ៊ីរ៉ង់ ខណៈសំឡេងស៊ីរ៉ែនប្រកាសអាសន្នបានបន្លឺឡើងពេញរដ្ឋធានីនៃប្រទេសទាំងពីរ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

អាជ្ញាធរកូវ៉ែតបានបញ្ជាក់ថា ការវាយប្រហាររបស់អ៊ីរ៉ង់បានបង្កឱ្យមានអគ្គិភ័យឆាបឆេះរោងចក្រផលិតអគ្គិសនី និងចម្រោះទឹកសាប ជាថ្ងៃទីពីរជាប់ៗគ្នា។ ចំណែកនៅប្រទេសបារ៉ែន ដែលជាទីតាំងឈរជើងរបស់កងនាវាចរទី៥ អាមេរិក ក៏បានប្រកាសពីការបាញ់ទម្លាក់ដ្រូន និងមីស៊ីលអ៊ីរ៉ង់ជាច្រើនគ្រាប់ផងដែរ ព្រមទាំងចោទប្រកាន់ទីក្រុងតេហេរ៉ង់ ថាមានចេតនាវាយប្រហារលើជនស៊ីវិល។

ការប្រឈមមុខដាក់គ្នានេះ កើតឡើងបន្ទាប់ពីយោធាអ៊ីរ៉ង់ប្រកាសកាលពីព្រឹកថ្ងៃអាទិត្យថា ខ្លួនបានប្រើប្រាស់ដ្រូនអត្តឃាត វាយប្រហារលើមូលដ្ឋានយោធាអាមេរិកចំនួន ២កន្លែងនៅកូវ៉ែត ដើម្បីសងសឹកការវាយប្រហាររបស់អាមេរិក។

គួរបញ្ជាក់ថា ការវាយបករបស់អ៊ីរ៉ង់នេះ ធ្វើឡើងបន្ទាប់ពីអាមេរិកបានប្រកាសវាយប្រហារលើអ៊ីរ៉ង់ ដើម្បី «ផ្តន្ទាទោស» ចំពោះការបាត់បង់ជីវិតកងទ័ពអាមេរិកជាលើកដំបូង ចាប់តាំងពីជម្លោះបានផ្ទុះឡើងវិញ។ បញ្ជាការដ្ឋានកណ្តាលអាមេរិក (CENTCOM) បានបញ្ជាក់ថា ទាហានអាមេរិក ២នាក់បានស្លាប់កាលពីថ្ងៃសុក្រ អំឡុងពេលទប់ទល់នឹងការវាយប្រហារដោយមីស៊ីលផ្លោង និងដ្រូនរបស់អ៊ីរ៉ង់ ខណៈទាហានម្នាក់ទៀតកំពុងបាត់ខ្លួននៅឡើយ៕