ទាហានអាមេរិកម្នាក់ស្លាប់ ក្នុងពេលធ្វើប្រតិបត្តិការបំផ្ទុះគ្រាប់យុទ្ធភណ្ឌមិនទាន់ផ្ទុះ នៅភាគខាងជើងអ៉ីរ៉ាក់ (Video inside)
20-07-2026 08:59
(វ៉ាស៊ីនតោន)៖ ទាហានអាមេរិកម្នាក់បានស្លាប់ អំឡុងធ្វើប្រតិបត្តិការបំផ្ទុះគ្រាប់យុទ្ធភណ្ឌមិនទាន់ផ្ទុះសល់ពីដ្រូនមួយគ្រឿងរបស់អ៉ីរ៉ង់ដែលត្រូវបានបាញ់ទម្លាក់ នៅភាគខាងជើងប្រទេសអ៉ីរ៉ាក់ កាលពីថ្ងៃសៅរ៍។ នេះបើតាមការបញ្ជាក់ពីយោធាអាមេរិក ដកស្រង់ចេញផ្សាយដោយទីភ្នាក់ងារសព័ត៌មាន AFP។
ទីបញ្ជាការកណ្ដាលរបស់សហរដ្ឋអាមេរិក ក៏បានឱ្យដឹងនៅថ្ងៃអាទិត្យ ទី១៩ ខែកក្កដា ឆ្នាំ២០២៦ ដែរថាសាកសពមនុស្សម្នាក់មិនទាន់ស្គាល់អត្តសញ្ញាណត្រូវបានរកឃើញនៅឯទីតាំងដែលរងការវាយប្រហារដោយមីស៊ីល និងដ្រូនរបស់អ៉ីរ៉ង់ លើកងកម្លាំងអាមេរិកក្នុងប្រទេសហ្ស៊កដានី កាលពីថ្ងៃសុក្រសប្ដាហ៍មុន ដោយបានសម្លាប់ទាហានអាមេរិក ២នាក់ផ្សេងទៀតផងដែរ។
ការស្លាប់របស់ទាហានអាមេរិកកាលពីថ្ងៃសៅរ៍ បានធ្វើឱ្យចំនួនទាហានអាមេរិកស្លាប់កើនដល់ ១៧នាក់ ចាប់តាំងពីសហរដ្ឋអាមេរិក និងអ៉ីស្រាអែលបើកការវាយប្រហារលើអ៉ីរ៉ង់កាលពីថ្ងៃទី២៨ ខែកុម្ភៈកន្លងទៅដែលបង្កទៅជាសង្រ្គាមមកទល់នឹងពេលនេះ។
សហរដ្ឋអាមេរិកកំពុងបង្កើនការវាយប្រហារលើអ៉ីរ៉ង់ បន្ទាប់ពីកិច្ចព្រមព្រៀងឈប់បាញ់បណ្ដោះអាសន្នមួយដែលត្រូវបានចុះហត្ថលេខាកាលពីខែមុនបានដួលរលំ។ អ៉ីរ៉ង់វិញ បានបង្កើនការវាយប្រហារដោយដ្រូន និងមីស៊ីលលើមូលដ្ឋានទ័ពអាមេរិកនៅក្នុងប្រទេសកូវ៉ែត បារ៉ែន និងហ្ស៊កដានី ស្របពេលការធ្វើនាវាចររបស់កប៉ាល់ដឹកប្រេងឆ្លងកាត់ច្រកសមុទ្រ Hormuz បានថយចុះយ៉ាងខ្លាំង ជាហេតុធ្វើឱ្យតម្លៃប្រេងហក់ឡើងខ្ពស់ជាង ៩០ដុល្លារក្នុងមួយបារែល៕
